KAK Submete Hikas Prosesu 38 Ba MP, Inklui Roo Haksolok

DILI, STLNEWS.co – Komisaun Anti Korupsaun (KAK) liu husi Diresaun Investigasaun submete hikas prosesu sira neebe durante nee sira halao hela investigasaun ba iha Ministeriu Publiku (MP) hodi kontinua halo investigasaun, tanba hahu husi komisariu laiha prosesu hirak nee pendente hela.

“Iha loron 29 Dezembru tinan 2023 nee, prosesu hotu neebe iha KAK ita haruka hotu ona ba iha Ministeriu Publiku inklui mos kazu Roo Haksolok, no daudaun nee prosesu andamentu lao oinsa Ministeriu Publiku mak hatene,” dehan Diretor Investigasaun KAK, Jose Verdial ba STL iha Dili, Kuarta (31/01/2024).

Nia hatutan, iha loron 6 Janeiru tinan 2024 mak sira foin halo kompletu tan informasaun balu ba iha Ministeriu Publiku, no seidauk too iha relatoriu final, maibe foin too deit iha relatoriu interkelar.

Hahu husi komisariu laiha mai too agora, prosesu neebe sira haruka ikus ba iha Ministeriu Publiku hamutuk 38, iha loron 6 Janeiru nee.

Nia hatete, prosesu sira neebe haruka ba iha Ministeriu Publiku inklui mos kazu Roo Haksolok neebe antes nee KAK halo investigasaun no rona ona sasin lubuk ida, daudaun nee MP mak kontinua halo investigasaun.

Diretor nee afirma, oras nee prosesu iha KAK laiha ona, no KAK sira hela ho averiguasaun deit.

Iha fatin ketak, Akademiku UNTL Mateus Martins dehan, komisariu KAK laiha ikus mai KAK labele halao servisu, prosesu hotu tenki haruka ba iha MP, ida nee ladun diak.

“Hau hanoin KAK nia servisu mos importante tebes, maibe komisariu laiha sira labele halao servisu, ikus mai prosesu hotu tenki haruka ba iha MP, tuir lo-loos labele akontese hanesan nee,” dehan nia.

Nia hatutan, governu no PN tenki tau mos kestaun komisariu sai hanesan asuntu importante ida, atu nomeia lalais ema ida ba iha knaar komisariu nian hodi KAK bele funsiona normal.

(ter)

LEAVE A REPLY

Please enter your comment!
Please enter your name here