DILI, STLNEWS.co – Oras nee daudaun fos ho marka iha saku lolon Manu Vitoria sai prekupasaun ema hotu nian, tanba nee ekipa prevensaun husi Komisaun Anti Korupsaun (KAK) tun direita ba iha kompanhia Perissos nia fatin, atu hatene lo-loos konaba kestaun nee.
Diretor Jeral Prevensaun Sensibilizasaun KAK, Rosario Saldanha Araujo dehan, informasaun nee sai viral tiha iha media, no Prezidente Republika husu KAK atu buka tuir informasaun, tanba saida mak too akontese konaba fos nee, no atu haree konaba ida nee akontese duni ka lae. Tanba nee, ekipa tun kedan ba iha kompanhia nia fatin.
“Ohin hau hamutuk ho ekipa ba iha Konpanhia Perissos nia fatin, konfirma tiha ema sira servisu iha neeba, maibe Diretor Kompanhia sai tiha ba rai liur, nia sei fila iha Sesta, hasoru malu ho KAK hodi fo informasaun balu konaba asuntu fos nian,” dehan nia ba STL iha knaar fatin Obrigado Barak, Kaikoli, Tersa (11/07/2023).
Nia hatutan, deskobrementu ida nee AIFAESA nia servisu, maibe asuntu balu liga ba oinsa kompanhia atu halo nia jestaun diak, no jere buat hotu lao diak, atu benefisia ba povu iha rai ida nee, parte ida mos husi KAK nian neebe temi iha artigu 20 lei MTCCI nian.
Nia esplika, sira seidauk hetan informasaun neebe mai adekuadu no klaru liu, tanba nee sei tenta atu hasoru malu ho diretor.
Tuir nia, presiza duni halo intervensaun, tanba kestaun nee sai boot tiha. AIFAESA halo nia konferensia, Perissos halo nia konferensia, too kondena malu atu lori ba tribunal, tanba nee KAK laos atu ba hodi buka frakeza, maibe buka atu justifika lo-loos iha duni ka lae, hanesan saida mak espalha iha media sira, akontese duni iha kompanhia ka lae.
Antes nee Empreza Perissos Ezije Autoridade Inspesaun Fiskalizasaun Atividade Ekonomiku Sanitaria no Alimentar, Instituisaun Publiku (AIFAESA.IP) atu hatun lalais rezultadu teste laboratoriu fos Manu Vitoria.
“Ami Perissos Vitoria Lda, kompanhia renomadu neebe kompromete atu fornese produtu kualidade diak ba familia Timor Leste nian, ho dalan nee hatoo deklarasaun publiku ida atu trata kritika difamatoria husi AIFAESA.IP konaba marka fos rai Manu Vitoria nee. Ami kondena tanba akuzasaun nee ho fundamentu neebe laiha prova, dalan AIFAESA.IP nian nee laiha teste laboratoriu mak klarifika nia asaun sira no laiha dadus faktual ida atu sustenta sira nia akuzasaun,“ dehan Finansia Kompanhia Perissos, Melania Magno.
Nia dehan, tanba AIFAESA.IP la fo dadus husi espertu sira seluk, hanesan nutrisionista sira no doutor sira. Importante atu hatene katak AIFAESA.IP laiha kompetansia iha area avaliasaun kualidade fos ka produtu ruma neebe relasiona ho alimentasaun. Kompara ho nee, nain ba Perissos ho tinan 30 resin nia esperiensia iha importasaun no distribuisaun fos diak ba Timor Leste nia ema barak, no kontribui ba seguransa alimentar iha Timor Leste.
Kompanhia Perissos konsidera, AIFAESA.IP halo akuzasaun falsu neebe lao, danu boot ba nia marka nomos la hamenus kompromisu sira nian atu fo produtu diak. Tanba nee, husu ho determinasaun ba AIFAESA.IP atu hatun malu, situasaun nee imediatamente hodi emiti pedidu deskulpa publiku ba Perissos Vitoria Lda no retrata sira nia deklarasaun difamatoriu.
Nia esplika, AIFAESA.IP la kumpri pedidu ida nee iha prazu 48 oras, husi momentu lao, neebe hatoo iha deklarasaun publiku ida nee, sei laiha eskolha seluk liu tan, atu prosesa AIFAESA.IP iha tribunal atu proteje reputasaun sira nian marka no buka desizaun kauza justu konaba prejuizu neebe AIFAESA.IP halo ba sira nia negosiu.
(ter)
