Kazu Eis Ministra Adaljiza & Eis Konsul Sidney, Selu Indemnizasaun

DILI, STLNEWS.co – Kazu Eis Ministra Negosiu Estranjeira Adaljiza Magno no Eis Konsul Jeral Sidney iha Australia, Luciano Valentim da Conseisao, autor ezije indemnizasaun US$ 12.600.00.

Prosesu refere antes nee tribunal rona ona deklarasaun husi sasin lubuk ida, no prosesu nee tama iha tribunal, tanba parte mandatariu autor konsidera esteitmentu balu husi ministra ho lia falsu, no autor senti prejudikadu hodi hatama prosesu nee iha tribunal.

Antes tama ba iha alegasaun, iha loron Kinta (04/01/2024) tribunal liu husi Juiz koletivu, sei rona uluk deklarasaun husi sasin nain tolu.

Iha sala julgamentu laran, liu husi video konferensa sasin Jorge Trindade Camoes hanesan Eis Sekretariu Jeral MNEC, atual Embaixador Timor Leste iha Bruxelas deklara, nia konhese eis ministra, tanba momentu neeba asumi kargu nudar ministra.

Sasin deklara, konaba entrevista neebe eis ministra koalia sai iha media, konaba transferensia osan tarde, nia parte mos asesu no haree.

Sasin deklara tan, molok entrevista, antes nee mos sasin konversa ona ho eis ministra konaba tranferensia orsamentu ba konsul tarde, no momentu neeba sasin informa ba ministra katak, transferensia nee tarde tanba iha mudansa ba endresu, maibe laos informa troka konta bankaria.

Sasin esplika, husi ministeriu halo hela transferensia ba, maibe iha fulan Outubru osan neebe halo transferensia ba banku rejeita hodi haruka osan fila fali mai, no sasin haruka nia parte finansa ba konfirma iha banku sira hatoo informasaun ida katak, husi mudansa enderesu nee afeta mos ba transferensia osan.

Hatan konaba tanba sa mak banku la halo transferensia, nia parte dehan ida nee nia la iha konhesimentu, maibe sasin hatene deit mak kauza husi mudansa enderesu, afeta mos ba transfrensia orsamentu tama tarde.

Sasin Flaviola Henrique da Cruz Ofisial Funsionariu MNEC liu husi video konferensa katak, transferensia orsamentu tarde, tanba falhansu husi mudansa ba enderesu, tanba momentu neeba mudansa ba enderesu Konsul la fo hatene ba iha Sede. No sira nia parte mak buka tuir hodi ba halo konfirmasaun iha banku, no banku informa katak ita mudansa ba enderesu, tanba nee mak osan devolve fali husi banku Sidney nian.

No sasin deklara tan, mosu tiha falhansu orsamentu nee, mak husi Konsul foin informa konaba mudansa enderesu ba iha sira.

Aleinde nee Sasin Nilton Saad, Diretor Nasional Finansa MNEC, iha sala julgamentu deklara, konaba orsamentu devolve husi banku Sidney nian, tanba sira informa katak mudansa ba enderesu. Momentu neeba sira mos rona iha enderesu foun, maibe la iha informasaun husi Konsul konaba mudansa enderesu, tanba nee mak sira la halo alterasaun sistema ba iha Ministeriu Finansa, tanba tuir regra neebe iha kuandu iha mudansa ba enderesu, husi parte nee rasik mak informa mai sira, hodi hatoo ba iha Ministeriu Finansa.

Tuir sasin nee, kuandu enderesu altera ona, numeru IBAN mos altera, tanba nee orsamentu halo transferensia ba labele tama. Sasin nee deklara, mudansa ba iha enderesu nee husi parte Konsul nian la informa ba iha sira nia parte.

Rona tiha sasin nain tolu, tribunal konsidera katak provas sufisiente ona, tanba nee husu ba iha parte mandariu autor no reu atu tama ba iha alegasaun.

Iha alegasaun ba dala uluk, parte mandatariu husi eis konsul nian Sergio Dias Quintas, husu ba iha estadu atu selu indemnizasaun neebe durante nee autor sofre ona.

“Autor ezije konaba indemnizasaun husi estadu atu selu danus materias no naun materias, US$ 12.600.00,” dehan nia.

Tuir nia, valor neebe husu razoavel, tanba deklarasaun ministra nian iha media mak hamosu prezuiju, halo moe perante iha komunidade internasional, tanba nee mak hatama asaun nee atu estadu konsidera katak, nia sofre hela prezuiju ruma, estraga nia boa nome.

Nia hatutan, espera tribunal bele haree katak petisaun neebe autor hatama liu husi produsaun de prova, bele konsidera katak petisaun nee prosedente atu estadu liu husi MNEC bele selu indemnizasaun ba autor.

Esplika tan, petisaun neebe autor hatama nee husu ba estadu, tanba altura neeba ministra asumi hela kargu nudar ministra, tanba nee estadu mak sei selu indemnizasaun ba autor. Maibe sira mos iha hanoin ona atu hatama tan asaun sivil ida, konaba pesoal Adaljiza Magno, atu individualmente bele marka prezensa iha tribunal konaba petisaun neebe iha futuru atu hatama kontra nia.

Iha alegasaun nee, husi parte mandatariu reu nian husu tribunl atu tetu, no haree deklarasaun sasin sira nian hotu atu foti desizaun neebe justu.

Audensia julgamentu nee prezide husi Juiz Koletivu, Juiz Prezidente Edite Palmira, mandateriu autor reprezenta husi Defensor Sergio Dias Quintas, mandatariu reu reprezenta husi Prokurador Alfeu Morreira.

(ekipa STL)

LEAVE A REPLY

Please enter your comment!
Please enter your name here