DILI, STLNEWS.co – Tribunal Judisial Primera Instansia Dili liu husi despaisu ikus, iha loron Kinta nee (24/08/2023) aplika medida Termu Indentidade rezidensia (TIR) ba arguidu nain 4, neebe deskonfia envolve iha kazu nee.
Konfrontu nee akontese iha area Manumeta Rai Hun, aldeia Mate Moris, Suku Vila Verde, Postu Administrativu Vera Cruz, Munisipiu Dili iha loron Domingu (21/08/2023).
Tribunal halo tiha indentifikasaun ba arguidu nain 4 ho inisial AL, MS, XAF, FX, ikus mai tribunal liu husi juiz turnu Jumiati Freitas desidi aplika TIR ba iha arguidu nain 4.
Tuir defeza arguidu sira nian, Agustinha de Olivera katak, tribunal aplika medida TIR ba arguidu nain 4.
“Tribunal aplika deit medida TIR ba arguidu nain 4, tanba arguidu nain 4 la envolve iha krimi neebe Ministeriu Publiku akuza ba,” dehan Defeza ba jornalista sira iha Tribunal Dili, Kinta (24/08/2023).
Nia hatutan, arguidu nain 4 nee iha balu mos sofre sira nia uma hetan estragus hotu, tanba nee konsidera medida neebe tribunal aplika kmaan ona, nia parte aseita no la halo rekursu.
Nia esplika, prosesu nee MP promove krimi tolu ba arguidu nain 4, danu agravadu, amesa no arma branka.
Antes nee iha alegasaun MP husu tribunal atu aplika medida Aprezentasaun periodika ba arguidu nain haat, no defeza husu atu aplika TIR ba arguidu sira, tanba konsidera katak la iha indisus forte.
Prosesu nee, Prezide husi Juiz Turnu Jumiati Freitas, MP reprezenta husi prokurador Ricardo Leite, arguidu hetan asistensia legal husi Defensora Publika Agustinha de Oliveira.
(ter)
