Kazu Pendente Tanba Kauza Jestaun

DILI, STLNEWS.co – Jurista konsidera katak, kazu pendente neebe akontese iha tribunal sira, tanba kauza husi jestaun tribunal lao ladun diak.

“Kazu pendente Jestaun Tribunal la los, nee tanba kestaun jestaun, la iha forsa atu jere kazu,” dehan Jurista Alexandre Corte Real ba STL iha Tribunal Dili, Segunda (04/12/2023).

Nia hatutan, atu redus kazu sira nee, tuir lo-loos ba oin loke tan tribunal iha munisipiu sira atu apoiu servisu tribunal nian atu redus kazu pendente.

Tuir nia, lalika realiza tan tribunal movel ona, diak liu harii tribunal permanente iha neeba, haruka autores judisial sira ba hela iha neeba, halao servisu iha fatin neebe iha, hodi redus mos prosesu sira neebe pendente hela.

Iha fatin ketak, Akademiku UNTL, Sebastiao Dos Santos dehan, tribunal tenki iha planu diak hodi redus kazu pendente sira, tanba ohin loron ema barak sei halerik ba sistema justisa.

“Hau hanoin atu redus kazu pendente tribunal bele halo planu ida neebe diak, tanba ohin loron sosiedade sira sei halerik hela ba justisa, tanba prosesu balu tama hela iha Tribunal, to agora seidauk julga,” dehan nia.

Nia esplika, tuir lo-loos ba oin presiza kria tan tribunal iha munisipiu sira, atu lori justisa hakbesik ba iha komunidade sira.

Aleinde nee, Prezidente Tribunal Rekursu, Deolindo Dos Santos dehan, oras nee daidaun TR iha ona planu atu hari tribunal iha Munisipiu Vikeke, Ermera no Maliana, hanesan parte ida atu redus kazu pendente no lori justisa hakbesik ba komunidade sira.

(ter)

LEAVE A REPLY

Please enter your comment!
Please enter your name here