DILI, STLNEWS.co – Tribunal Judisial Primera Instansia Dili liu husi despaisu ikus, aplika medida aprezentasaun periodika ba arguidu inisial RS, neebe komete krimi abuzu seksual ba menor hasoru vitima ho insial HE.
Halo tiha indentifikasaun, iha despaisu ikus Juiz turnu desidi aplika medida aprezentasaun periodika ba arguidu, atu ba aprezenta aan iha postu polisia neebe hela besik ba, semana ida dala tolu.
Tuir defeza arguidu nian Humberto Alves katak, tribunal aplika medida aprezentasaun periodika ba arguidu.
“Tribunal aplika medida aprezentasaun periodika semana ida dala tolu ba arguidu, atu aprezenta aan iha postu polisia neebe hela besik ba semana ida dala tolu, iha loron Segunda, Kuarta no Sesta,” dehan nia ba STL iha Tribunal, Sesta (21/07/2023).
Nia hatutan, iha alegasaun parte defeza husu tribunal atu aplika medida TIR, no prokurador husu prizaun preventiva, maibe ikus mai tribunal desidi aplika medida aprezentasaun periodika ba arguidu.
Nia esplika, hanesan defeza aseita ho despaisu nebe tribunal hatun, tanba asegura arguidu nia prezensa ba iha prosesu investigasaun.
Tuir kronolojia katak, akontesimentu nee akontese iha Taibesi, no deskonfia arguidu neebe ho idade tinan 20 halo krimi hasoru lezada neebe ho idade 14, hanesan nia namorada.
Momentu neeba iha loron 10 fulan Outubru, arguidu detein kedan husi polisia, hodi kompleta 72 horas hafoin submete mai iha prosesu primeiru interogatoriu.
Prosesu nee prezide husi juiz turnu Ana Paula, Ministeriu Publiku reprezenta husi Prokurador Claudino no Rozario, arguidu hetan asistensia legal husi Defensor Publiku Humberto Alves.*
