DILI, STLNEWS.co – Too ohin loron Komisariu Komisaun Anti Korupsaun (KAK) seidauk iha, tanba nee jurista konsidera bele afeta ba servisu KAK nian.
“Komisariu KAK neebe too ohin loron seidauk iha nomeasaun, nee afeta ba servisu KAK nee rasik, sem Komisariu KAK instituisaun estadu nee sei la halo nia servisu ho masimu,” dehan Jurista Sergio Dias Quintas ba STL iha Tribunal, Tersa nee (28/06/2023).
Nia hatutan, komisariu nia knaar mak hanesan dirije atividade komisaun nia, halo buat hotu, no dilijensia hirak neebe kompetensia komisaun nian iha ambitu prevensaun kriminal nian.
Nunee mos halo rekomendasaun no elabora relatoriu sira, koordena hahalok sira no dilijensia investigasaun kriminal neebe haknaar ba komisaun.
Nia esplika, fahe ba pesoal teniku investigador, prosesu inkeritu no atual neebe Ministeriu Publiku delega, ka juiz haruka, iha ambitu prosesu judisial, kontrola legalidade hahalok sira no dilijensia prevensaun no investigasaun kriminal nian neebe komisaun halo.
Tuir Sergio, knaar ida mos asegura koordenasaun pesoal tekniku investigador ho autoridade judisial sira, halo rekrutamentu ba tekniku investigador no pesoal apoiou sira seluk, tuir difini ona iha lei, halo kbiit disiplinar ba pesoal neebe servisu ba komisaun.
No mos elabora relatoriu anual konaba atividade komisaun nian, liu-liu konaba numeru intervensaun sira neebe iha prosesu inkeritu hodi aprezenta ba Parlamentu Nasional. Kompetensia hirak nee preve iha artigu 7 numeru 2 husi Lei numeru 8/2009, entaun knaar sira nee komisariu mak halao, laos ema seluk, bainhira instituisaun estadu nee falta nia lideransaun certo que afeta ba nia prestasaun servisu.
Iha fatin ketak, Akademiku UNTL Rafael de Jesus dehan, Komisariu KAK nia funsaun importante tebes, husu governu foun tau mos kestaun ida nee sai hanesan ajenda importante ida, atu nomeia ema ida neebe ho kapasidade diak atu bele apoiu servisu KAK nian lao diak liu tan.
“Too oras nee komisariu seidauk iha, servisu balu KAK labele halo tanba deit komisariu laiha, husu governu foun konsidera mos kestaun ida nee, sai hanesan ajenda importante ida,” dehan nia.
Akademiku nee hatutan, durante nee KAK halo investigasaun ba prosesu korupsaun lubuk ida, ida nee hatudu katak KAK hamriik hodi kombate korupsaun, nomos prevene korupsaun iha rai laran.
(ter)
