DILI, STLNEWS.o – Too oras nee daudaun seidauk iha Komisariu Anti Korupsaun foun hodi lidera instituisaun refere, tanba nee afeta ba ezekusaun orsamentu neebe iha la lao.
“Afeta duni, tanba ita haree ba asuntu ida ezekusaun orsamentu la lao, sai dezentedimentu boot ba programa neebe ita planu iha tinan 2022 nian kuaze la lao,” dehan Diretor Jeral Prevensaun Sensibilizasaun KAK, Rosario Saldanha Araujo ba STL iha Kaikoli, Segunda (14/08/2023).
Tuir nia, konaba servisu investigasaun nian iha kazu lubuk ida mak iha, sira labele lao too iha munisipiu hodi halo investigasaun, bolu sasin hodi presta deklarasaun, ida nee labele lao tanba komisariu laiha. No tuir lei nee kompetensia tomak iha komisariu mak bele fo delegasaun ba iha investigador sira hodi halao servisu sira nee, tanba liga ba iha ezekusaun orsamentu.
Nia esplika, atu nomeia komisariu, ida nee desizaun husi politiku sira mak atu hili komisariu ida neebe merese atu mai iha KAK, maibe tuir sira nia haree katak, komisariu ida neebe lidera KAK tenki ema ida neebe independente, neutru no hatene sistema sira neebe lao iha KAK durante nee.
Reforsa tan, liu liu liga ba lei neebe iha preve buat lubuk ida iha neeba. Ezemplu asuntu prevensaun no asuntu deklarasaun rikusoin nian, asuntu kriminais nian tenki iha konhesimentu ba ida nee.
Nunee, iha ema potensia lubuk ida neebe durante nee ema hotu haree hela, maibe atu nomeia ka lae depende fali ba iha governu mak atu nomeia ida neebe mak sai komisariu.
Iha fatin ketak, Jurista Sergio Dias Quintas dehan, komisariu laiha servisu KAK nian sei la funsiona ho diak.
“Hanoin komisariu laiha servisu KAK la funsiona ho diak, tanba nee sujere atu nomeia lalais komisariu ida, atu servisu KAK nian bele funsiona normal,” dehan nia.
Jurista nee mos husu ema neebe atu lidera KAK tenki nomeia ema ida neebe iha kapasidade, atu bele apoiu servisu KAK nian lao ba oin. Tanba KAK mos hanesan orgaun polisial investigasaun ida neebe durante nee halao hela investigasaun ba prosesu lubuk ida.
Aleinde nee, Diretor Investigasaun KAK, Jose Verdial dehan, hahu husi komisariu laiha too mai agora, servisu investigasaun balu la lao.
“Labele notifika parte sira, kuandu ita presiza atu fo deklarasaun ruma, tanba buat hotu kompetensia tomak kabe ba iha komisariu,” dehan nia.
Husu atu nomeia lalais ema ida, atu servisu KAK nian bele lao normal liu-liu iha parte investigasaun nian.
(ter)
