DILI, STLNEWS.co – Too oras nee Komisariu Komisaun Anti Korupsaun (KAK) seidauk iha, tanba nee sei afeta ba prosesu sira neebe antes nee KAK halo investigasaun bele kaduka.
“Komisariu KAK seidauk eleitu, sei afeta ba prosedimentu investigasaun nee rasik, em termus kazu balu bele demora no bele kaduka,” dehan Jurista Sergio Dias Quintas ba STL iha Tribunal Dili, Segunda (09/10/2023).
Nia hatutan, tuir lei numeru 8/2009 iha artigu 7 katak, Komisariu KAK koordena hahalok sira no dilijensia investigasaun kriminal neebe haknaar ba komisaun, fahe ba pesoal tekniku investigador, prosesu inkeritu no atus neebe Ministeriu Publiku delega, ka juiz haruka, iha ambitu prosesu judisial.
Sergio reforsa, bainhira KAK sem Komisariu sei afeta ba servisu investigasaun nee rasik, tanba atu hahu investigasaun kriminal ruma relasaun ho korupsaun tenki inisia husi Komisariu KAK tuir artigu 16. Tanba atu termina investigasaun kriminal ruma kona ba korupsaun nee kabe ba kompetensia Komisariu KAK.
Iha fatin ketak, akademiku UNTL Pedro Dos Santos dehan, tuir lolos PN tenke tau atensaun seriu ba kestaun nee, atu nomeia lalais komisariu ida.
“PN tenki konsidera kestaun ida nee seriu, atu nomeia ona komisariu ida, bazeia ba lista neebe governu rekomenda mai,” dehan nia.
Tuir akademiku nee, kuandu Komisariu KAK laiha halo servisu KAK paradu, ema balu mos aproveita ho tempu hanesan nee atu halo aktu balu neebe viola lei, tanba nee presiza duni nomeia Komisariu KAK iha tempu badak.
Aleinde nee, Diretor Investigasaun KAK Jose Verdial afirma, kuandu Komisariu seidauk iha, servisu KAK la funsiona ho diak.
“Servisu KAK nian iha parte balu labele lao, hanesan notifika arguidu ka sasin sira atu presta deklarasaun, tanba tuir lei KAK nian komisariu mak iha kompetensia tomak,“ dehan nia.
(ter)
