DILI, STLNEWS.co – Formados neebe kompete ba iha Sentru Formasaun Juridiku no Judisiariu (CFJJ – sigla portugues) tenki iha konhesimentu ba lingua portugues, tanba material barak no lei barak mak hakerek ho lian portugues.
“CFJJ atu produs formados sira ba iha area neebe mak iha, maibe tenki iha konhesimentu ba lian portugues, tanba material barak mak hakerek ho lian portugues,” dehan Diretora CFJJ, Marcelina Tilman da Silva ba STL, Kinta nee (28/07/2022).
Nia hatutan, estudante sira neebe eskola hela direitu, diak liu aproveita tempu hodi aprende mos lingua portugues, atu nunee tama iha sentru formasaun bele fasil atu kompete iha area neebe iha.
Iha fatin ketak, Akademiku Universidade Nasional Timor Lorosae (UNTL), Mario Noronha dehan, presiza duni aprende lian portugues, tanba ita nia lian ofisial.
Nia afirma tan, estudante neebe aprende direitu, hakaas aan atu kompete iha sentru formasaun, nunee bele hadia servisu iha area justisa nian hodi lao ba oin.
(ter)
