DILI, STLNEWS.co – Ministeriu Publiku iha nia alegasaun ba krimi violensia domestika ho forma ofensa integridade fizika simples, husu tribunal singular atu kondena arguidu insial ES nudar laen, tanba komete krimi hasoru lezada inisial SA nudar feen.
Alegasaun nee halao iha Tribunal Judisial Primera Instansia Dili iha loron Kinta nee (27/04/2023), prezide husi Juiz Singular Arjentino Nunes, Prokurador reprezenta husi Claudino do Rozario, arguidu hetan asistensia legal husi Defensor Publiku Manuel Amaral.
Iha alegasaun nee prokurador haree katak, faktus neebe konsta iha akuzasaun provadu hotu, katak arguidu komete duni krimi hasoru lezada, hanesan saida mak hakerek ona iha akuzasaun.
Tanba nee, prokurador ba prosesu haree katak, arguidu antes nee mos sai ona arguidu ba krimi seluk neebe tribunal aplika pena suspensaun, tanba nee prokurador iha nia alegasaun husu opsaun rua.
Ida prokurador husu atu konfirma ba iha sistema, se arguidu sei iha periodu suspensaun nia laran, husu atu aplika pena prizaun efetivu tinan ida, maibe se pena suspensaun remata ona husu aplika pena multa ba iha arguidu, atu iha futuru arguidu labele halo tan hahalok refere. No multa neebe prokurador husu mak US$ 120.00.
Enkuantu, husi parte Defeza Joao De Carvalho husu tribunal atu aplika pena neebe justu, tanba haree katak arguidu iha nia deklarasaun deklara ona, ho lezada diak malu hela, hamutuk nafatin iha uma ida, no husi problema mosu too mai agora la iha tan problema.
Rona tiha parte rua, tribunal adia ba loron seluk hodi rona desizaun.
(ter)
