Konduz Motor Velosidade Makaas, DM Soke Mate Zilberto

DILI, STLNEWS.co – Tribunal Judisial Primeira Instansia Dili julga arguidu inisial DM, tanba konduz motorizada ho velosidade makaas, hodi rezulta vitima Zilberto iis kotu.

Tuir akuzasaun neebe lee sai iha loron Tersa (23/01/2024) katak, iha loron 13 fulan Setembru tinan 2022, arguidu konduz motorizada ho velosidade makaas husi diresaun Portu Tibar ba Likisa.

No arguidu inisial CX tula hela vitima Zilberto ho motorizada, derepente too iha area merkadu Likisa nian, arguidu CX atu silu motor tama ba iha merkadu nian, derepenti arguidu DM mai husi kotuk hodi soke motor nia kotuk, halo vitima monu tun no mate kedan iha fatin.

Konsekuensia husi arguidu DM nia konduta, no arguidu CX neebe la iha karta kondusaun uza motor, kauza vitima monu no mate fatin.

Konsekuensia husi arguidu sira nia hahalok nee, Ministeriu Publiku akuza arguidu sira komete krimi omisidiu neglijente.

Hatan ba akuzasaun nee, arguidu nain rua konfesa ba faktus, no deklara sira halo akordu rezolve ona tuir familia nian.

Iha alegasaun prokurador husu atu kondena arguidu DM pena prizaun tinan 3 nia ezekusaun suspende, no arguidu CX pena prizaun tinan 2 nia ezekusaun suspende.

Rona tiha alegasaun, tribunal adia ba loron seluk hodi rona desizaun.

Audensia nee prezidi husi juiz Ana Paula, Ministeriu Publiku reprezenta husi Prokurador Aderito Tilman, arguidu sira hetan asistensia legal husi Defensor Publiku Rui Guterres.

(ter)

LEAVE A REPLY

Please enter your comment!
Please enter your name here