Krimi Violensia Domestika Kontinua Aas

DILI, STLNEWS.co – Oras nee daudaun krimi neebe rejista makaas iha Tribunal Judisial Primeira Instansia Dili (TJPID), mak krimi violensia domestika kompara ho krimi sira seluk.

“Tribunal mantein nafatin ho krimi violensia domestika, tanba nee kada loron tribunal julga krimi nee barak liu kompara ho krimei sira seluk,” dehan Juiz Administrador Tribunal Judisial Primeira Instansia Dili, Afonso Carmona ba STL iha TJPID, Segunda nee (17/04/2023).

Nia sublinha, krimi nee akontese mane barak liu mak sai arguidu, tanba nee iha keixa neebe hatoo ba polisia sira, ikus mai prosesu sira nee tenki tama too iha tribunal.

Juiz Afonso nee dehan, krimi nee ohin loron numeru kontinua aumenta, tanba ema barak iha ona konhesimentu ba lei neebe iha, no sira hatene aktu nebee sira hetan ida nee hanesan krimi, ikus mai sira mos aprezenta keixa.

Nunee, atu redus numeru husi krimi ida nee, juiz nee husu atu ema idak-idak kontrola nia emosaun, liu-liu banhira moris iha problema nee tenki kontrola aan, atu labele halo asaun neebe kontra lei.

Iha fatin ketak, Akademiku UNTL Rafael Soares dehan, ohin loron ema balu nia konhesimentu ba lei violensia domestika sei menus.

“Ohin loron ema balu nia konhesimentu sei menus, tanba nee sira halo asaun ruma hasoru sira nia parseiru, sira konsidera ida nee normal,” dehan nia.

Nia tenik, krimi violensia domestika hanesan aktu ida neebe la diak, tanba nee husu atu sosializa nafatin lei neebe iha, atu ema iha konhesimentu ba lei nee, ema mos tauk bainhira halo krimi.

Rafael dehan, se kazu nee mane barak mak halo agresaun, presiza sosializa lei ba xefi familia sira, tanba ho sosializasaun ba lei nee hanesan mos parte ida atu redus krimi neebe iha. Tanba ema ida hatene ona aktu ida krimi, nia sei la halo tan aktu nee.

(ter)

LEAVE A REPLY

Please enter your comment!
Please enter your name here