Kumpri Notifikasaun, Jornalista Rogerio Presta Deklarasaun Iha MP

DILI, STLNEWS.co Ministeriu Publiku notifika jornalista Hatutan.com ho naran Rogerio Pereira Carceres, tanba kumpri notifikasaun, presta ona deklarasaun iha Ministeriu Publiku.

“Iha Tersa tuku 15:00 loraik, ami husi media Hatutan.com simu notifikasaun ida husi Ministeriu Publiku, no konteudu husi notifikasaun nee komparensia husu atu jornalista ho naran Rijerio Pereira Carceres iha loron 22 atu presta deklarasaun iha Ministeriu Publiku,” dehan nia nee ba jornalista sira iha Prokurador Kolmera, depois de presta deklarasaun, Kinta (22/06/2023).

Nia hatutan, hanesan jornalista nomos sidadaun baibain, kumpri notifikasaun neebe iha hodi presta deklarasaun iha Ministeriu Publiku.

Nia esplika, presta deklarasaun nee ligasaun ho publikasaun viajen prokurador nian ba iha rai liur, konaba parte sira nia labele fo komentariu, tanba segredu justisa.

Jornalista nee dehan, nia parte ba oin kontinua koopera, kualker prkurador sira presiza atu husu informasan ruma ligasaun ho saida mak iha, nia nafatin koopera hodi ba.

Iha fatin hanesan, Xefi Redasaun Hatutan.com, Fransisco Belo Ximoes da Costa dehan, kumpri notifikasaun liu husi reuniaun sira desidi jornalista refere atu presta deklarasaun.

“Hau nia jornalista simu notifikasaun husi Ministeriu Publiku, neebe parte sira lori ba entrega iha redasaun Hatutan.Com, hau mos iha neeba, buat neebe ami desidi hanesan sidadaun tenki kumpri ba notifikasaun neebe iha,” dehan nia.

Nia akresenta, se notifikasaun nee konaba konteudu publikasaun iha media Hatutan.Com relativamente ho dokumentus balu, nia parte hanoin iha lei komunikasaun sosial dehan ona, responsabilidade masimu ba produtu jornalista neebe publika iha media, responsabilidae juridiku xefi redasaun.

Fransisco dehan, Ministeriu Publiku iha nia maneira rasik atu notifika, se notifika jornalista ba aktu neebe nia halo fora husi produtu jornalista nian bele, maibe relasiona ho produtu jornalista nian, maneira neebe los mak notifika ba iha nia xefi redasaun, ida nee mak maneira neebe los tuir lei komunikasaun sosial nian.

(ter)

LEAVE A REPLY

Please enter your comment!
Please enter your name here