La Efetivu, KAK Kontinua Analiza Prosesu 49

DILI, STLNEWS.co – Maski Komisariu Komisaun Anti Korupsaun (KAK) seidauk iha, maibe servisu investigasaun kontinua halo analiza ba dokumentus sira.

Tuir Diretor Investigasaun KAK, Jose Verdial katak, servisu investigasaun nian mak avaliasaun objetiva ba aktu komisaun ida neebe akontese, no asaun ida avaliasaun nee laos bolu ema mai rona sasin deit fo deklarasaun hanesan arguidu, maibe hahu husi halibur dokumentus, halo analiza ba dokumentus, halo mapamentu ema hirak neebe envolve iha ida nee.

“Durante nee prosesu 49 neebe iha hela KAK nia liman, investigador kontinua halo analiza ba dokumentus sira, no avaliasaun ba dokumentus sira,” dehan Jose Verdial ba STL iha tribunal Segunda nee (29/05/2023).

Nia esplika, investigador sira prepara planu halo mapamentu, identifika ema sira neebe envolve iha prosesu nee, atendimentu keixa, ida nee mak parte KAK halo maski laiha komisariu.

Verdial dehan, sira nia servisu lao la efetivu tanba lei KAK nian fo knaar ba komisariu mak diriji komisaun, komisariu mak simu delegasaun husi Ministeriu Publiku hodi distribui ba investigador sira, nunee komisariu mak iha knaar atu kontrola nia legalidade ba aktu prevensaun no aktu investigasaun sira, no komisariu mak iha kompetensia hodi aprova kualker orsamentu ba atividade nian, tantu iha Dili laran no munisipiu, se komisariu laiha atividade lao la efetivu.

Nia esplika tan, oras nee daudaun komisariu laiha, tanba nee prezudika tebes servisu investigasaun nian.

Iha fatin ketak, Jurista Fernando da Costa dehan, governu presiza nomeia lalais ema ida hodi kaer instituisaun KAK.

“Hau hanoin instituisaun KAK nee importante tebes, tanba nee husu governu atu nomeia lalais ema ida hodi lidera instituisaun nee,” dehan nia.

Akademiku nee mos husu atu nomeia ema neebe iha kapasidade diak, atu bele halao servisu ho diak liu-liu apoiu servisu KAK nian bele lao ho diak.

(ter)

LEAVE A REPLY

Please enter your comment!
Please enter your name here