DILI, STLNEWS.co – Jurista Timor oan konsidera atu halo nomeasaun ba Komisariu Anti Korupsaun (KAK) foun, presiza halo alterasaun ba lei KAK.
“Ita haree katak Lei numeru 8/2009 presiza halo revizaun liu-liu ba artigu 7 no 11, tuir hau nia haree artigos referidos desnesessariu, karik bele halo revizaun para simplifika nomeasaun ba komisariu foun KAK, se karik mak la halo revizaun ba lei KAK, fiar katak iha futuru sei difikulta nafatin prosesu nomeasaun nee rasik,” dehan Jurista Sergio Dias Quintas ba STL iha Mandarin, Segunda nee (24/04/2023).
Sergio hatutan, iha instituisaun estadu ida mak laiha dirizente masimu tuir lei haruka, sei afeta ba nia funsionamentu normal nee rasik, no ida nee mak agora KAK hasoru.
Jurista nee dehan tan, instituisaun estadu hanesan KAK nee importante no estrateziku tebes, maibe tanba falta husi nia lideransa afeta ba nia servisu, tanba orgaun soberania sira la dun fo importansia hodi hili nia komisariu foun ida nee, tanba nee lamentavel.
Aktual defensor nee reforsa tan, bainhira laiha Komisariu KAK foun, sei afeta ba funsionamentu normal KAK nian rasik inklui prosesu investigasaun. Tanba nee, komisariu laiha KAK bele halo servisu nafatin, maibe la masimu ida.
Iha fatin ketak, Akademiku UNTL Romerio Maia dehan, presiza halo nomeasaun ba komisariu foun.
“Presiza halo lalais nomeasaun ba komisariu KAK foun, atu bele apoiu servisu iha instituisaun nian, atu bele lao diak,” dehan nia.
Akademiku nee konsidera servisu KAK nia mos importante, tanba nee presiza hili komisariu foun ida, atu bele apoiu servisu KAK nian, tanba durante nee KAK halo hela investigasaun ba prosesu lubuk ida.
(ter)
