DILI – La simu lia fuan at neebe mak lezada Judit da Costa hasai ba nia banin feto no mane, arguida Mariana, Diana no Jesuina hurlele lisuk nia maun nia kaben.
Liu husi audensia julgamentu tribunal lee sai akuzasaun husi Ministeriu Publiku katak, iha loron (27/04/2016) iha oras tuku 12h00 meudia iha fatin Bidau Toko Baru, katak iha momentu neeba lezada Judit da Costa iha uma kous nia oan atu ba sosa pulsa no eskrim hetan arguidu nain tolu Jesuina, Mariana Diana no seluk tan.
Arguida sira husi Amu la Bekusi ba hetan lezada iha dalan no koalia ba lezada katak ba uma ami atu husu buat ida. Bainhira lezada hatan arguida Jesuina katak atu husu saida, arguida dudu lezada neebe kous nia oan soe tan ba arame parpadu hodi rezulta nia liman fuan parte los hetan kanek. Nunee lezada likit iha arguida nia liman, tuir mai arguida Mariana no Diana mos tama hodi dudu lisuk lezada ho nia oan ba arame parpadu halo nia oan tanis.
Nunee sasin Carmelita da Silva Gama rona mak ba hadau labarik husi lezada, haree sira diskute no rakut malu. Bainhira sira sei diskuti malu, arguidu Vicente Guterres nudar arguida sira nia aman husi kotuk lori liman rua buti iha lezada nia kakorok no lori liman rasta lezada nia fuk ba kotuk.
Ho arguida sira nia hahalok nee halo lezada senti moras iha nia liman no ulun hodi halo nia ba halo tratamentu too HNGV. Arguidu Vicente dos Santos Guterres, Mariana Guterres, Jesuina do Carmo dos Santos, Diana dos Santos Guterres hanesan autor tuir artigu 30 n.2 KP ba krime OIFS neebe punidu no punivel iha artigu 145 n.1 KP.
Hatan ba akuzasaun nee arguida Diana dehan, akuzasaun nee balun los no balun lalos. Lalos sira nia aman rakut lezada nia fuk, maibe sori fodik lezada ho Mariana neebe haksesuk malu hela. Lalos mos dudu nia ho nia oan ba arame parpadu.
Rona tiha deklarasaun husi arguida nee, tribunal adia fali audensia nee ba iha loron (6/11/2017) hodi rona fali deklarasaun husi lezada. Arguidu sira seluk antes nee tribunal rona ona sira nia deklarasaun. Informasaun kompletu iha STL Jornal no STL Web, edisaun Kinta (22/12/2016). Domingas Gomes
