Laen Amante Ho Feto Seluk

DILI, STLNEWS.co – Tribunal Judisial Primera Instansia Dili halao julgamentu ba arguidu inisial EMRM neebe halo amante ho seto seluk, no ikus halo agresaun hasoru lezada inisial YN hanesan feen.

Motivu akontese violensia hasoru feen, tanba deit laen halo amante iha kotuk, komesa nervozu la hatudu oin hamnasa no kontenti iha familia, ikus mai hamosu violensia.

Julgamentu neebe halao iha loron Sesta nee (16/06/2023), tuir akuzasaun neebe juiza Albertina lee sai katak, iha loron 26 Abril 2022 iha lezada no arguidu sira nia uma iha Manleu, arguidu uza liman tuku makaas dala ida kona lezada nia tilun.

Motivu tanba arguidu halo amante ho feto seluk, no lezada atu husu osan hodi selu uma aluga.

Hahalok arguidu nian nee beibeik ona, maibe lezada nunka halo keixa hasoru arguidu. Maibe ida ikus nee lezada senti ladun diak ona, tanba nee mak lezada halo keixa hasoru arguidu.

Konsekuensia husi arguidu nia hahalok nee, halo lezada senti moras hodi hatoo keixa, tanba nee Ministeriu Publiku akuza arguidu hanesan autor material ba krimi violensia domestika ho forma ofensa integridade fisika simples neebe previstu iha artigu 145 husi Kodigu Penal.

Iha sala julgamentu laran arguidu konfesa imparsial ba faktus katak, arguidu halo duni agresaun hasoru lezada, maibe agora sira separadu ona.

Iha sala julgamentu laran, tribunal labele rona lezada nia deklarasaun, tanba lezada nia paraderu la hetan.

Rona tiha parte rua nee, tribunal husu atu tama ba iha alegasaun, iha alegasaun nee Ministeriu Publiku hatete, maski lezada laiha maibe Ministeriu Publiku mantein ho lezada nia deklarasaun iha Ministeriu Publiku.

Tanba nee, Ministeriu Publiku husu tribunal atu kondena arguidu tuir krime neebe akuza ba arguidu.

Enkuantu parte defeza husu tribunal aplika pena adekuadu ba arguidu haree mos ho deklarasaun arguidu nian.

Rona tiha alegasaun, tribunal adia ba loron seluk hodi rona desizaun.

Audensia julgamentu nee prezidi husi juiz singular Albertina Neves, Ministeriu Publiku reprezenta husi Prokurador Hernani Rangel, arguidu hetan asistensia legal husi Pessoa Idonia.

(ter)

LEAVE A REPLY

Please enter your comment!
Please enter your name here