Tan Fos, Laen Lori Katana Taa Feen


DILI, STLNEWS.co – Ministeriu Publiku (MP) liu husi nia alegasaun ba krimi rua, violensia domestika ho forma ofensa integridade fisika simples no krimi arma branka, husu tribunal atu kondena arguidu inisial BC, tanba halo krimi hasoru nia lezada inisial OC.

Alegasaun nee halao husi prokurador titular Napoliao do Rozario iha Tribunal Judisial Primera Instansia Dili, Kuarta nee (10/05/2023).

Iha alegasaun nee, prokurador bazeia ba arguidu nia deklarasaun sira katak, fatus neebe konsta iha akuzasaun loos hotu, arguidu lori duni katana ida dudu ba iha nia feen nia kabaas, hodi rezulta nia feen book aan to kona lezada nia hirus matan raan sai barak, suku pontu hitu.

Ministeriu Publiku mos konsidera faktus neebe dehan motivu husi problema nee tanba foos provadu, bazeia ba arguidu nia deklarasaun iha tribunal.

Tanbe nee, prokurador hanesan nain ba iha proses laiha duvidas, mantein ho akuzasaun neebe iha, husu tribunal koletivu atu aplika pena prizaun tinan 3 ba arguidu, suspende mos ba tinan 3.

Enkuantu, husi parte defeza arguidu nian, Jose Guterres iha nia alegasaun haree katak, arguidu foin primera vez mai iha tribunal, no aktu neebe halo laos beibeik, maibe foin primeiru, no arguidu koopera ho justisa, defeza mos haree sira diak malu ona, tanba nee fiar kazu hanesan nee sei la akontese tan.

Iha alegasaun nee defeza husu atu tribunal aplika pena neebe justu, nunee rona tiha parte rua, tribunal adia ba loron seluk hodi rona desizaun.

(ter)

LEAVE A REPLY

Please enter your comment!
Please enter your name here