DILI, STLNEWS.co – Ministeriu Publiku liu husi nia alegasaun ba krimi omisidiu agravadu, husu tribunal koletivu atu aplika pena prizaun ba iha arguidu inisial FAC nudar alin, neebe hakotu vitima inisial AAC nia vida.
Alegasaun nee halao iha loron Tersa nee (11/07/2023), iha Tribunal Judisial Primera Instansia Dili. Iha alegasaun nee Prokurador Renato Bere Nahac solisita ba iha tribunal koletivu, atu aplika pena prizaun tinan 16 ba iha arguidu, tanba konsidera faktus neebe konsta iha akuzasaun provadu hotu.
Prokurador nee bazeia ba arguidu nia deklarasaun, nia mak lori duni tudik sona ba iha vitima too mate, depois mak lori hena taka tiha, tanba nee prokurador laiha duvidas, mantein ho akuzasaun neebe iha.
Enkuantu husi parte defeza Jose Guterres katak, arguidu konfesa ona ba faktus neebe iha, katak momentu neeba nia lori duni tudik sona lezadu, tanba deit la kontrola aan.
Tuir defeza, arguidu mos foin primera vez mai iha tribunal, arepende ba nia hahalok nee, tanba nee husu tribunal atu aplika pena neebe justu ba iha arguidu.
Rona tiha parte rua, tribunal adia ba loron 26 fulan ida nee hodi rona desizaun.
Tuir akuzasaun neebe iha katak, iha loron 24 fulan Dezembru 2019, maizumenus iha oras 24h00 kalan boot iha Aldeia Mankolhata, Suku Loidahar, Postu Administrativu Likisa.
Iha momentu neeba vitima ho naran AAC toba iha nia kuartu laran. Arguidu haree nia kaben no oan sira toba dukur, nia hader mai hodi hakat tama ba iha vitima neebe nudar arguidu nia maun nia kuartu.
Bainhira hakat tama ba haree vitima toba dukur hela iha kuartu leten, ho kondisaun isin molik la tau kamiza, nunee arguidu haree vitima nia tudik meik ida tau iha sumasu okos.
Arguidu foti tudik hodi sona no fai diretamente ba vitima nia kabun, ou kanosen parte karuk dala ida, no vitima soe ain iis kotu kedas.
Nunee arguidu losu sai tudik hodi hatama fali ba iha kulsaun okos, no lori hena taka tiha vitima nia isin no sai husi kuartu.
Arguidu fila ba nia kuartu hodi toba, iha dader arguidu hader mai halo finji la hatene buat ida.
La kleur iha sasin naran EG mos mai bolu vitima atu ba halo servisu PNDS nian hanesan kanalizador ba bee moos. Bainhira sasin bolu vitima, arguidu koalia katak vitima sei toba, no haruka sasin tama ba bolu rasik iha kuartu laran.
Sasin tama kuartu laran haree vitima falun aan hela ho hena, no bolu vitima dala tolu maibe vitima la hatan no la hader.
Sasin haree vitima nia kaben mutin sai, no kaer ba vitima nia liman malirin no tos tiha ona. No sasin halai sai ba hakilar ba vizinhu, fo hatene ba iha Xefi Aldeia hodi fo hatene ba polisia. Hodi evakua kedan vitima mai iha HNGV, hodi submete ba iha autopsia.
(ter)
