DILI, STLNEWS.co – Relasiona ho mandatu Komisariu Komisaun Anti Korupsaun (KAK) nian neebe remata ona, Prokurador Jeral Republika konsidera servisu KAK neebe halao husi investigador sira lao nafatin.
“Ida nee nomeasaun politika ami la tama iha neeba, lei KAK tau tan Ministeriu Publiku, maski seidauk nomeia komisariu, maibe servisu lao nafatin, investigador sira profisionalizmu, no KAK hanesan polisia espesial ba korupsaun, halao nia papel investigasaun orientadu no kombinasaun ho prokurador sira,” dehan Prokurador Jeral Republika Alfonso Lopez ba jornalista sira iha Sentru Kultural Embaixada Portugal, Kinta nee (13/04/2023).
Nia sublinha, se diak liu iha komisariu, maibe ida nee kompetensia Parlamentu Nasional nian.
Prokurador Jeral Republika dehan, tan tuir prosesu nain mak Ministeriu Publiku konaba delegasaun, no delegasaun tenki iha parseria iha diskusaun no labele husik, tenki fiksa prazu, no laiha komplementu bele avoka atu foti fali. Tanba nee, kuandu delega kompetensia, investigador sira tenki kumpri ba prazu, kuandu nesesita prolonga, tanba ida nee lao nafatin, no reuniaun ho investigador sira, atu sira bele halao sira nia knaar.
Iha fatin ketak, Akademiku UNTL Manuel Soares dehan, presiza nomeia lalais komisariu ida hodi apoiu KAK halao nia servisu neebe iha.
“Hau hanoin presiza duni nomeia lalais komisariu ida atu apoiu KAK hodi halao sira nia servisu ho diak,” dehan nia.
Akademiku nee konsidera KAK nia servisu importante mos, tanba halo investigasaun ba kazu korupsaun, tanba nee presiza nomeia lalais ema ida hodi sai hanesan komisariu.
(ter)
