DILI, STLNEWS.co – Ministru Justisa (MJ) halao abertura ba formasaun ho tema jeneru, violensia bazeia ba jeneru no kuadru legal sira ba iha funsionariu no ofisial justisa tribunal.
“Formasaun ba ofisial justisa no funsionariu sira neebe halao knaar iha Tribunal Dili, Suai, Oekusi no Baukau. Sira nia servisu prinsipal fo asistensia ba juiz sira konaba prosesual sira, atu garante juiz sira bainhira halo desizaun, halo notifikasaun no sitasaun ofisial sira bele iha konhesimentu diak liu tan,” dehan Ministru Justisa Amandio de Sa Benevides ba jornalista sira iha Salaun MJ, Kuarta (02/08/2023).
Tuir nia, sira iha ona konhesimentu, maibe presiza iha formasaun beibeik atu sira bele aprende diak liu tan, hodi administra justisa, atu prosesu sira neebe tama iha tribunal, ho sira nia apoiu bele ajuda tribunal nia servisu lao ho diak, atu foti desizaun ida neebe diak.
Nia esplika, formasaun neebe halao ba loron rua nee, ofisial no funsionariu sira hamutuk nain 40 resin mak partisipa, hetan apoiu husi UNDP, espera formasaun nee remata sei hasai kapasidade ofisial sira nian atu halao knaar ho diak.
Iha fatin ketak, Prezidente Asosiasaun Majislatura Judisial TL, Antonino Gonsalves dehan, apresia tebes ho formasaun sira hanesan nee, atu bele aumenta kapasidade funsionariu no ofisial sira nian.
“Oras nee daudaun ferias judisial hela, aproveita tempu sira hanesan formasaun ba funsionariu no ofisial planu diak ida, atu tulun sira bainhira halao servisu iha tribunal,” dehan nia.
Gonsalves hatutan, knaar importante ofisial sira nian atu tulun juiz sira, maibe sira mos iha formasaun atu eleva sira nia kapasidade, hodi halao servisu ho diak.
(ter)
