MP Alega Diretor Prevensaun KAK Pena Multa

DILI, STLNEWS.co – Ministeriu Publiku (MP) liu husi nia alegasaun ba krime Pekulatu de Uzu, husu tribunal atu aplika pena multa ba iha arguidu inisial RSA neebe hanesan Diretor Jeral Prevensaun no Sensibilizasaun Komisaun Anti Korupsaun (KAK).

Tuir Defeza Arguidu nian, Marsal Mascarinhas katak, iha alegasaun nee prokurador husu pena multa.

“Prokurador husu pena multa ba tribunal,” dehan Marsal ba STL iha Dili, Domingu (03/11/2023).

Iha alegasaun nee, Prokurador Rogerio Viegas katak, faktus neebe konsta iha akuzasaun konsidera provadu hotu, tanba nee husu ba iha tribunal liu husi Juiz Singular Albertina Neves, atu aplika pena prizaun tinan 1, substitui ba pena multa US$ 120.00, no selu taxa ba estadu hamutuk US$ 30.00.

Aleinde nee, Defeza Marsal Mascarinhas iha alegasaun, aseita ho pedidu Ministeriu Publiku nian no husu tribunal atu aplika pena multa ba iha arguidu.

Rona tiha alegasaun husi parte rua, juiz desidi adia hikas julgamentu ba iha loron 13 fulan Dezembru, hodi rona desizaun.

Tuir akuzasaun husi Ministeriu Publiku iha inidisiu sufiente katak, arguidu RSA hanesan funsionariu publiku iha Komisaun Anti Korupsaun hanesan Diretor Jeral ba prevensaun, nia mos hanesan militante partidu balun.

Iha loron 14 Janeiru 2023, arguidu utiliza Portatil (Leptop) ho marka HP kor sinjentu partisipa iha eventu partidu politiku. Portatil ho Marka HP kor sinjentu, rejistradu nudar patrimoniu Komisaun Anti Korupsaun atribui ba iha arguidu, tanba asumi kargu hanesan Diretor Jeral ba Prevensaun. Finalidade ba atende servisu KAK nian.

Maibe arguidu uza fali patrimoniu estadu hanesan sasan privadu hodi ba iha eventu partidu politiku nian no laiha autorizasaun husi superior hirarkia. Arguidu halo ida nee hodi benefisia nia aan no grupu balun.

Arguidu hatene katak, utiliza patrimoniu estadu ba benefisia nia aan no grupu balun sem autorizasaun husi instituisaun ka uza ba finalidade KAK, maibe ba fali partidu nee kontra regras neebe iha, maibe arguidu kontinua halo ida nee.

Ho nunee, enkontru katak iha indisiu forti kontra arguidu ba pratika krime Pekulatu de Uzu tuir artigu 83 lei 7/2020 konaba mediade prevensaun no kombate korupsaun.

Audensia julgamentu nee prezidi husi juiz singular Albertina Neves, MP reprezenta husi Prokurador Rogerio Viegas, arguidu hetan asistensia legal husi Defensor Publiku Marsal Mascarinhas.

(Ekipa STL)

LEAVE A REPLY

Please enter your comment!
Please enter your name here