MP Alega JAS Baku Namorada

DILI, STLNEWS.co – Ministeriu Publiku (MP) liu husi alegasaun, solisita ba iha tribunal singular atu aplika pena tetu mos arguidu tetu ho deklarasaun hotu.

Iha alegasaun nee MP haree katak, mantein ho krime neebe imputa ba iha arguidu, tanba nee husu tribunal atu tetu arguidu nia deklarasaun, no aplika pena tuir krime neebe iha.

Enkuantu husi parte defeza nian, husu ba iha tribunal atu tetu sirkunstansia hotu, no aplika pena neebe justu no adekuadu ba iha arguidu.

Rona tiha parte rua, tribunal adia ba loron seluk hodi rona leitura sentensa.

Tuir faktus katak, iha loron 3 fulan Marsu 2019, lezada simu osan iha arguidu $280 hodi fo ona $50 dolar ba arguida nia inan M.

Iha fulan Marsu 2019, arguidu fo numeru SDSB ba lezada sosa no kona ho osan $450, tanba nee lezada hakarak fahe rua maibe arguidu hakarak foti hotu.

Arguidu telefone ba lezada katak osan neebe kona husi SDSB bele fo deit sorin, maibe ikus fali mai arguidu hakarak fo hotu.

Arguidu fo tan numeru SDSB ba lezada sosa no kona hetan $35, tanba nee lezada husu atu gasta osan ida nee no arguidu mos aseita.

Iha loron 5 fulan Marsu 2019, arguidu telefone ba lezada atu lori osan sira neebe hetan husi SDSB ba entrega iha nia uma, maibe lezada tauk tanba arguidu sempre halo asaun hasoru nia, no arguidu entrega telefone ba nia inan atu koalia ho lezada kuandu arguidu halo buat ruma sei telefone ba iha polisia.

No lezada hatan ba arguida nia inan loraik maka sei ba, tanba sei iha eskola. Lezada ba uma ho testamuna ida atu hasoru nia inan la kluer arguidu mos sai husi kuartu laran.

Lezada entrega osan $430 ba arguidu nia inan no hamrik atu fila, no arguidu hamrik ho emosaun dehan nusa maka entrega deit osan $430, la entrega kompletu $ 708.00.

No lezada husu fali osan nee no dehan depois maka rezolve fali, lezada hamrik atu fila, ho emosaun arguidu dudu nia monu tuku iha hirus matan monu ba sofa leten.

Arguidu husu lezada nia telemovel la fo, tanba nee arguidu hadau tiha nia karteira ho osan $70. Konsekuensia husi arguidu nia hahalok nee, halo lezada sente moras no lakon nia pasta karteira no osan $70.

Tanba nee MP akuza arguidu hanesan autor roubu neebe previstu iha artigu 253 husi KP.

Hatan ba faktus nee arguidu deklara katak, iha faktus balu loos no balu lalos.

Arguidu deklara katak, konaba loron neebe entrega osan lolos iha loron 29 fulan Janeiru 2019. No arguidu maka entrega osan $280 ba lezada tanba momentu neebe sira sei relasaun namora.

Arguidu deklara tan, iha momentu neeba arguidu hanesan kondutor lori kareta ba tiha Ossu, iha loron 9 arguidu fo nomor SDSB ba lezada hodi sosa maibe la kona. Iha fali loron 10 arguidu kontinua fo nomor lezada sosa no kona osan $350. No liu tiha semana ida arguidu fo nomor haruka lezada sosa tan SDSB, no kona osan $35.

Arguidu deklara, liu tiha loron balu lezada telefone ba arguidu atu fo para arguidu, no lezada mos dehan atu entrega arguidu nia osan neebe iha nia kompletu. Arguidu fila husi Ossu lezada dehan atu lori osan ba entrega, tanba nee arguidu haruka atu lori ba entrega iha uma maibe lezada lakohi.

Tanba nee arguidu haruka lezada koalia ho nia inan atu bele lori osan mai arguidu nia uma, lezada lori osan mai arguidu nia uma maibe osan la kompletu, tanba nee arguidu deside hodi foti lezada nia karteira sai hanesan jaminan ida.

Ho ida nee maka lezada ba keixa iha polisia hodi foti arguidu.

Audensia julgamentu nee prezide husi juiz kolektivu Afonso Carmona, Albertina Neves, Ercilia de Jesus, MP reprezenta husi prokurador Renato Bere Nahak, no arguidu hetan asistensia legal husi Advogada Privada.*

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Horta Husu Komunidade Fo Resposta Los Ba Ajente Enumerador

DILI, STLNEWS.co - Prezidente Republika (PR), José Ramos Horta, husu ba komunidade sira atu fo resposta neebe los ba ajente enumerador sira neebe halo...

Kazu Droga TDD Aplika Medida AP Ba Arguidu Nain 9

DILI, STLNEWS.co - Tribunal Distrital Dili (TDD) iha loron Segunda nee (15/08/2022) liu husi despaisu ikus ba prosesu primeiru interogatoriu (AP), desidi aplika medida...

Governu Lansa Sensus Populasaun & Uma Kain 2022

DILI, STLNEWS.co - Governu liu husi Ministeriu Finansas (MF) Segunda nee ofisialmente lansa sensus populasaun no uma kain iha tinan 2022 nee. Iha fulan Marsu...