DILI, STLNEWS.co – Ministeriu Publiku (MP) liu husi nia alegasaun final, husu juiz koletivu atu kondena prizaun tinan 4 ba arguidu (laen) inisial JP, tanba halo beibeik agresaun hasoru nia feen (lezada) inisial EGS.
Alegasaun nee halao iha Tribunal Judisial Primera Instansia Dili, iha loron Kinta nee (23/03/2023), neebe prezide husi juiz koletivu no Juiz Prezidente mak Ivan Suritai, ho nia Adjuntu Juiza Ana Paula, no Juiz Arjentino Nunes, parte prokurador reprezenta husi Prokurador Jasinto Babo, arguidu hetan asistensia legal husi Defensor Publiku Marsal Mascarinhas.
Iha alegasaun ba prosesu nee, Prokurador Jasinto Babo neebe hanesan prokurador titular ba prosesu nee katak, nia parte mantein ho akuzasaun neebe iha, provadu arguidu komete duni krimi maus tratus, no ofensa integridade fizika simples konjuga ho lei violensia domestika.
MP mos haree katak, arguidu konfesa imparsial ba faktu neebe iha, no arguidu mos hanesan ema kondenadu ida neebe antes nee hetan ona pena prizaun tinan ida fulan neen iha prizaun Bekora, maibe arguidu sai iha liur kontinua halo tan krimi.
Nunee prokurador konsidera katak, durante iha prizaun arguidu seidauk aprende formasaun masimu hodi kapasita aan, tanba nee mak arguidu sai iha liur kontinua halo krimi. Prokurador haree katak, arguidu nia hahalok nee maski nia arepende iha tribunal, maibe fiar katak ba futuru nia sei kontinua halo hahalok nee.
Atu prevene arguidu nia hahalok nee, MP laiha duvidas mantein ho akuzasaun neebe iha, husu tribunal koletivu atu kondena pena prizaun tinan 4 ba arguidu.
Enkuantu husi parte Defeza, Marsal Mascarinhas iha nia alegasaun, husu ba iha tribunal koletivu atu aplika pena neebe justu, tanba haree arguidu nia deklarasaun katak, iha futuru sei la halo tan hahalok nee, no hahu husi problema too mai agora laiha tan problema ona.
Rona tiha parte rua, tribunal desidi adia ba loron seluk hodi rona desizaun.
Tuir akuzasaun neebe iha katak, iha loron la apuradu, maibe iha fulan Fevereru 2022, iha Tasi Tolu, arguidu lori liman tuku lezada no basa lezada, motivu husi problema nee tanba arguidu sempre hemu tua.
Arguidu mos antes nee hetan ona kondenasaun ba krimi ida, neebe tribunal desidi aplika pena prizaun tinan ida fulan neen ba arguidu iha prizaun.
Iha fulan Maiu tinan 2022, arguidu lori liman tuku lezada no foti serveja neebe lezada faan ho kolega sira hemu tiha, motivu husi problema nee tanba deit lezada atu deskansa, arguidu koalia barak mosu diskusaun too arguidu baku lezada.
Iha fulan la apuradu, maibe iha tinan 2022 arguidu baku lezada, tanba deit problema neebe akontese iha kalan, dader mosu diskusaun too arguidu baku lezada.
Iha mos tinan hanesan, fulan la apuradu, arguidu lori ai sar baku nia oan hakiak, tanba deit arguidu problema ho lezada.
Hatan ba faktus neebe iha, arguidu konfesa imparsial ba faktus katak, arguidu halo duni hahalok sira nee, tanba arguidu ho kondisaun lanu.
Arguidu mos rekonhese katak, arguidu tama duni prizaun no sai iha tinan 2019, arguidu arepende ba nia hahalok nee, no promete sei la halo tan hahalok nee iha futuru.
Arguidu deklara katak, nia iha duni feen boot neebe ho oan ida, no lezada neebe ida agora nee arguidu sai husi prizaun foin moris hamutuk ho lezada nee, no lezada nee mos iha oan haat no iha eis laen.
(ter)
