DILI, STLNEWS.co – Ministeriu Publiku (MP) la insura prosesu krimi ruma hasoru Jornalista Rogerio Pereira Carceres no Xefi Redasaun Fransisco Simoes Belo da Costa husi media online hatutan.com no la konstitui sira hanesan arguidu.
Tuir karta komunikadu neebe STL asesu husi media Ministeriu Publiku (MP) Kinta nee (13/07/2023) hatete, relasiona ho inkrisaun Jornalista Rogerio Pereira Carceres no Xefi Redasaun Fransisco Simoes Belo da Costa husi media online hatutan.com, iha ambitu prosesu inkeritu disiplinar neebe nia prosedimentu lao hela iha Konselhu Superior Ministeriu Publiku hodi hamosu duvida iha opiniaun publiku.
Konsellu Superior Ministeriu Publiku (KSMP) hafoin reuniaun iha sesaun ordinaria loron 10 de Julhu 2023 delibera liu husi unanimidade informa, MP la insura prosesu krimi ruma hasoru Jornalista Rogerio Pereira Carceres no Xefe Redasaun Fransisco Simoes Belo da Costa husi media online hatutan.com no la konstitui sira hanesan arguidu hafoin publikasaun artigu ho titlu “Deskonfia PJR Alfonso Lopes, ho nia Asesor Juridiku Osacar Tavares Uza osan estadu halo viajen privadu iha Portugal”.
La eziste iha orgaun ka servisu sira iha MP nian, kualker prosesu krimi kontra jornalista relasionadu ho ezersisiu sira nia funsaun.
Liu husi deliberasaun no.41/KSMP/2023 husi KSMP loron 29 de Maiu 29 2023, insaura tiha prosesu inkeritu disiplinar internu ida, hodi apura responsabilidade funsionariu no ajente sira servisu apoiu tekniku no administrativu PJR nian, relasiona ho divulgasaun publika dokumentu no informasaun neebe protejidu husi sijilu profisional, neebe ninia prosedimentu sira lao hela iha servisu inspesaun MP nian.
Iha prosesu inkeritu disiplinar nee mak halo tiha inkrisaun ba sidadaun Rogerio Pereira Carceres no Xefi Redasaun Fransisco Simoes Belo da Costa ho kualidade hanesan sasin, tanba sira iha konhesimentu konaba faktu hirak neebe sai nudar objetu ba prosesu inkeritu disiplinar nee.
Ho notisia neebe publika husi jornal nasional Timor Post no Independente iha loron 3 de Julhu tinan nee, atribui tiha ba Prezidente AJTL, KSMP esklarese katak, MP laiha kompetensia legal atu defini krimi sira, tanba materia krimi sira nudar kompetensia PN no governu nian, liu husi autorizasaun PN.
(dom)
