DILI, STLNEWS.co — Ministeriu Publiku iha loron Kinta nee (05/05/2022) liu husi alegasaun final, husu tribunal atu aplika pena prizaun tinan 5 ba arguidu ho inisial JB.
Razaun Ministeriu Publiku husu atu aplika pena refere, tanba konsidera faktus neebe konsta iha akuzasaun provadu hotu.
Nune mos bazeia ba arguidu nia deklarasaun katak, arguidu naok duni telefone rua nee.
Ho arguidu nia deklarasaun prokurador la iha duvidas, husu tribunal aplika pena prizaun tinan 5 ba arguidu.
Husu mos tribunal atu devolve hikas objetivu prendidu lezada sira nian.
Enkuantu, husi parte defeza husu tribunal atu aplika pena suspensaun ba arguidu, haree ba arguidu nia arependimentu no foin primeira vez mai iha tribunal.
Rona tiha parte rua, tribunal adia ba loron 17 fulan Maiu hodi rona desizaun.
Audensia julgamentu nee, prezide husi juiz kolektivu, Ana Paula, Maria Solana, Joao Ribeiro, Ministeriu Publiku reprezenta husi prokurador Antonio Tavares, arguidu hetan asistensia legal husi Defensora Publika.
(ter)
