DILI, STLNEWS.co – Tribunal Distrital Dili halao julgamentu ba arguidu ho inisial RF hanesan mane foun, neebe halo agresaun hasoru lezadu inisial AL hanesan banin mane.
Iha loron Sesta nee, iha sala julgamentu laran Juiz prosesu Ivan Suritai haree katak, krimi nee nia natureza semi publiku, lei fo dalan atu bele dada fila, bainhira parte vitima aseita.
Iha sala julgamentu laran, lezadu neebe hanesan banin mane deklara, durante nee arguidu neebe hanesan nia mane foun, seidauk fo sala tuir kultura nian ba lezadu.
Maibe lezadu haree katak, nia oan feto boot mak agora daudaun sai hanesan arguidu nia feen ho kondisaun isin rua ka gravida, tanba nee, maski hanesan banin mane hetan baku husi mane foun, haree ba kondisaun oan feto nian, perdua mane foun nia hahalok nee.
Iha sala julgamentu, arguidu senti tristi ba nia hahalok nee, arguidu hamriik iha nia banin mane nia oin, husu deskulpa no promete sei muda nia hahalok nee, sei buka dalan atu fo sala tuir kultura neebe iha.
Rona tiha parte rua, tribunal mos fo advertensia ba arguidu atu labele halo tan hahalok nee.
Ikus mai, tribunal homologa no absolve arguidu husi instansia.
(ter)
