DILI, STLNEWS.co – Tribunal Judisial Primera Instansia Dili liu husi despaisu ikus ba prosesu primeiru interogatoriu, desidi aplika medida Proibisaun Auzensia ba oknum Polisia Nasional Timor Leste (PNTL), Ajente Xefi husi Unidade Batalaun Ordem Publika (BOP) inisial DJSD neebe tiru kanek joven nain ida, ho naran Julivio Pereira Bruno Pinto, rezulta ain parte karuk tohar.
Ba prosesu ida nee, Ministeriu Publiku promove krimi Tentativa omisidiu. Tribunal halo tiha indentifikasaun ba arguidu, juiz prosesu Albertina Neves desidi aplika medida Proibisaun Auzensia ba arguidu.
“Tribunal aplika medida nee atu labele sai ba rai liur, tribunal konsidera arguidu nia aktu nee la prienxe artigu neebe MP akuza, arguidu hanesan PNTL ema veteranus aprende ba nia hahalok laiha perigu da fuga, tanba nee aplika deit medida ida nee atu arguidu labele sai ba rai liur”, dehan Defensor Publiku, Eustaquio Guterres ba jornalista sira iha tribunal, Tersa nee (19/09/2023).
Nia hatete, arguidu bele lao ba mai, maibe labele sai ba rai liur, bainhira hakarak sai ba rai liur tenki husu lisensa husi Prokurador no Tribunal, no defeza konsidera medida nee justu. Iha sala julgamentu arguidu mos konfesa ba faktus, hatudu katak iha responsabilidade ba aktu nee.
Hatan konaba arguidu nia servisu, defeza deklara nia komando mak sei desidi.
“Nia servisu difisil ba hau atu halo komentariu konaba ida nee, tanba ida nee fila ba nia Komando Polisia mak sei desidi ida nee, tanba sira iha estatutu rasik no kompetensia Komandante sira mak sei desidi konaba ida nee,” dehan nia.
(ter)
