DILI, STLNEWS.co – Reprezentante povu iha uma fukun Parlamentu Nasional (PN) husu ba governu atu kontrola sigaru ilegal ne’ebe tama iha fronteira.
“Ita nia empreza balun hahu halerik ona, tanba sira hatama sigaru mai liu husi dalan legal hodi selu taxa ba kofre estadu, tanba ne’e ita tenki kontrola didiak sira ne’ebe sei lao ilegal, tanba la selu taxa, tan ne’e governu tenki buka meus, nune’e sira ne’ebe fa’an sasan ilegal bele liu husi dalan legal,” dehan Deputadu Bankada KHUNTO, Luis Roberto ba jornalista sira iha Parlamentu Nasional, Tersa (08/08/2023).
Nia afirma, atu kontrola atividade ilegal sira ne’e mak servisu iha fronteira tenki metin, liu-liu Alfandega, Unidade Polisia Fronteira nomos parte relevante sira ne’ebe servisu iha ne’eba tenki metin, tanba sigaru ilegal tama iha TL barak los.
No tuir informasaun husi parte balun katak, tinan-tinan taxa ba estadu ne’e maka’as, maibe agora tun, tanba impaktu husi atividade ilegal sira ne’e, tan ne’e papel governu nian atu hare’e didiak asuntu ne’e.
(mad)
