PDHJ Hetan Ona Notifikasaun Akordaun Husi Tribunal Rekursu

DILI, STLNEWS.co – Tribunal Rekursu notifika ona akordaun konaba pedidu neebe hatama husi Provedoria ba Direitus Umanus no Justisa (PDHJ), husu atu halo fiskalizasaun abstratu ba iha lei reforma Polisia Nasional Timor Leste (PNTL).

“26 Fulan Outubru mak ami hetan notifikasaun akordaun husi Tribunal Rekursu, iha desizaun neebe Tribunal Rekursu fo sira konsidera katak, dekreitu lei neebe ami tau iha kestaun artigu 128, tuir provedor nia haree inkonstituisional, tanba viola artigu 24 Konstituisaun nian, no desizaun husi Tribunal Rekursu nia opiniaun seluk, neebe hateten governu halo lei nee la viola konstituisaun, katak artigu nee konstitusional no halo tuir duni governu nia kompetensia,” dehan PDHJ, Virgilio da Silva Guterres ba jornalista sira iha PDHJ, Kuarta (29/11/2023).

Nia hatutan, iha prosesu atu too iha desizaun, Tribunal Rekursu husu opiniaun husi entidade rua, Prokurador Jeral no PM, iha sira nia desizaun hateten katak, PM la fo komentariu, no prokurador hatoo nia pozisaun, hanesan mos provedor no konsidera artigu 128 viola artigu 24 Konstituisaun.

Nia esplika tan, desizaun tribunal nian aas liu desizaun hotu, buat nebee provedor konsidera inkonstitusional, tribunal hateten dehan konstitusional, baze neebe hakarak atu klarifika husi konstituisaun artigu 50 koalia konaba direitu trabalhu, tama iha parte 2 neebe koalia konaba direitu liberdade fundamental, no konsider katak, kualker direitu lei neebe relasiona no implika direitu liberdade no garantia fundamental sira nee, tenki liu husi autorizaun husi PN, ida nee mak baze husi provedor hodi hatama pedidu ba iha Tribunal Rekursu.

Pedidu fiskalizasaun abastrata ba Tribunal Rekursu konaba reforma PNTL nian, liu-liu dekretu lei neebe koalia konaba reforma nee artigu 128 hetan ona desizaun, no iha desizaun nee tribunal nian hateten katak, artigu 128 nee konstituisional la viola lei no viola konsituisaun.

Provedor nee afirma, desizaun tribunal nee bele dehan katak, saida mak governu no komando halo bele dehan tuir dalan legal ninian.

Iha fatin ketak, Prezidente Tribunal Rekursu, Deolindo Dos Santos dehan, Tribunal Rekursu hasai ona desizaun konaba pedidu neebe hatama husi PDHJ.

“Desizaun sai tiha ona, kuaze semana rua ka tolu tiha ona, nee mak desizaun plenariu Tribunal Rekursu nian, sai tiha ona konaba pedidu fiskalizasaun abastratu husi PDHJ, liu husi plenariu TR nian hasai tiha ona desizaun,” dehan Deolindo.

Nia hatutan, desizaun nee atu metan ka mutin nia parte labele esplika, tanba nia parte mos tama iha desizaun ida nee, no labele esplika konaba desizaun nee.

(ter)

LEAVE A REPLY

Please enter your comment!
Please enter your name here