PNTL Rejistu Kazu 81

DILI, STLNEWS.co – Durante semana ida komandu Polisia Nasional Timor Leste (PNTL), rejistu kazu asidente no insidente hamutuk 81.

Portavoz komandu Jeral Polisia Nasional Timor-Leste, Superintendente Xefe Arnaldo Araujo hatoo kestaun nee ba jornalista sira, liu husi konferensia imprensa iha nia knaar fatin Caikoli Dili, Segunda (08/02/2021).

Nia dehan, komandu jeral PNTL liu husi portavoz hakarak informa mos ba publiku, durante semana ida nia laran iha dia 21 fulan Janeiru too 16 fulan Fevereiru iha insidente 56, no asidente 25.

“Husi insidente nee asaltu malu hamutuk 2, taa malu 4, violensia domestika 15, tuda malu 5, dezastre naturais 3, ahi han uma 1, no kazu omesidu 1,’ dehan nia.

Nia hatete, haree iha kazu sira nee asaltu malu maka barak, neebe maka akontese iha teritoriu laran tomak. Enkunatu aleinde nee iha kazu omesidu nee akontese iha munisipiu Lautem, iha dia 22 de janeiru 2021, iha Bairu Hicara, Aldeia Iraunu, Suku com Lospalos, tanba laen oho feen.

Depois PNTL sira hatene tiha konaba kazu nee, tuir deklarasaun katak, nia feen nee mak oho aan, maibe depois PNTL dezenvolve tiha investigasaun nee hatudu katak, vitima nee laos oho aan maibe hetan oho husi nia laen.

Tanba nee, agora vitima nee mate, no suspeitu oras nee dadauk hetan ona prizaun preventiva depois hodi ona ba iha Ministeriu Publiku hodi halo prosesu investigasaun tuir mai.

Vitima nee ho naran inisial RM, ho idade 40, suspeitu nee ho inisial A. Kazu akontese iha dia 22 fulan Janeiru tinan 2021.*

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here