DILI,STLNEWS.co – Sosiedade sira husu atu iha futuru estabelese tan prizaun ida hodi bele tau kondenadu sira, tanba oras nee dadur iha prizaun Bekora tau hamutuk deit entre dadur minoridade sira.
Hau hanoin importante tebes iha futuru atu estabele tan prizaun ida hodi tau kondenadu sira,” dehan Akademiku UNTL Sebastiao Soares ba STL iha TJPID, Tersa nee (02/05/2023).
Nia sublinha, ohin loron prizaun iha tolu hanesan prizaun Suai, Gleno no Bekora, maibe iha prizaun hirak nee, tuir nia haree prizaun Bekora tau dadur barak liu.
Tanba nee, husu ba iha governu ida nee diak liu estabelese tan prizaun ida, hodi tau dadur sira, liu-liu tau dadur sira labele haketak malu tuir idade neebe iha. Tanba ohin loron tama iha prizaun laos iha deit dadur neebe idade boot, maibe iha mos dadur neebe kiik ka hanaran dadur minoridade.
Iha fatin ketak, Ministru Justisa Tiago Amaral Sarmento dehan, tinan nee iha ona planu sei estabelese tan prizaun ida no fatin mos indentifika hotu ona.
“Osan tinan nee iha atu komesa ona prosesa, tanba prizaun Iraberek nee sai mos prioridade ba Ministeriu Justisa no governu nian atu harii prizaun ida neebe boot,” dehan Ministeriu Justisa.
Nia akresenta, iha Iraberek nee rai indentifika tiha ona, rai neebe diak no rekuzu sira ba iha neeba, bele aproveita hodi tuir formasaun, hanesan formasaun sira neebe oras nee daudaun halao hela iha prizaun Gleno, Suai no Bekora, se fatin luan bele hetan formasaun barak liu tan.
Esplika tan, rekuzu sira nia direitu no liberdade total hanesan sidadaun neebe iha liur mak laiha no iha limitasaun ona, maibe hanesan sidadaun Timor iha direitu ba buat hotu, livre hanesan ema baibain, iha liur mak labele.
Tanba nee, sira iha direitu atu asesu buat hotu, governu garante sira nia direitu fo atendimentu diak nafatin ba sira, bainhira sira reintegra fali ba iha sosiedade, bele aplika saida mak sira hetan ba sosiedade.
(ter)
