DILI, STLNEWS.co – Prokurador nain 5 sei aranka ba iha Portugal hodi tuir formasaun durante fulan 3 nia laran.
“Serimonia abertura primeiru kursu majistradu publiku iha Sentru Estudu Judisiariu Portugal, aban sei aranka,” dehan Prokurador Jeral Republika Alfonso Lopez ba jornalista sira iha Sentru Kultural Embaixada Portugal, Kinta nee (13/04/2023).
Nia sublinha, sentru estudu nee hanesan sentru ida neebe konhesidu internasionalmente, tanba nee prokurador sira sei ba halo formasaun komplementar iha sentru neeba.
Formasaun nee sei hahu iha loron 17 Abril tinan nee, no sei remata iha loron 17 Julhu, no formasaun nee sei kompleta ba fulan tolu.
Prokurador Jeral dehan, realiza formasaun nee tanba iha parseiru husi Uniaun Europia, no realiza formasaun nee tanba tama iha planu Prokurador Jeral nian, sai mos hanesan planu estratejiku ida, no aprovadu deliberadu husi Konselhu Superior Majistradu Ministeriu Publiku.
No formasaun nee sei halao ba tinan rua fazeadamente, sira neebe ba uluk hanesan faze ba dala uluk nian, no antes nee mos iha fulan Fevereiru haruka Majistradu Ministeriu Publiku nain 6 tuir formasaun ba krimi espesializada ba krimi finanseira.
Prokurador nain 5 neebe sei ba tuir formasaun mak hanesan reprezenta husi prokurador primeira instansia Oekusi, Baukau, Kovalima, Dili no gabinete sentral kombate korupsaun. Ba oin sei haruka fali ba iha kontensiozu ba sivil, administrativu no koletivu sira.
Alfonso dehan, material neebe sira sei hetan husi formasaun nee mak krime finanseira, no aprofunda mos ho Portugues juridiku, tanba ho konhesimentu neebe diak bele halao servisu diak iha area justisa nian.
Iha fatin ketak, Akademiku UNTL Mateus Soares dehan, nia parte apresia ho planu prokurador nian, tanba liu husi formasaun nee bele aumenta kapasidade prokurador sira nian.
“Hau hanoin importante tebes ita nia prokurador sira tuir formasaun, tanba ida nee bele aumenta sira nia kapasidade, hodi dezenvolve ita nia nasaun bele lao ba oin,” dehan nia.
Akademiku nee mos husu atu prokurador sira neebe tuir formasaun tenki aprende ho didiak, hodi bele aplika iha knaar neebe halao nee.
(ter)
