DILI, STLNEWS.co – Prosesu pendente iha Tribunal Judisial Primera Instansia Oekusi, ba prosesu koletivu krimi hamutuk 196.
“Dadus nee hau asesu prosesu pendente krimi nian too iha Junhu 2023, ba iha prosesu pendente koletivu hamutuk 196, no prosesu pendente singular hamutuk 67, sura hamutuk pendente ba krimi nian 263,” dehan Juiz Administrador Tribunal Judisial Primera Intansia Oekusi, Arjetino Luiza Nunes ba STL iha Tribunal Dili, Segunda nee (31/07/2023).
Tuir Arjentino, ba iha prosesu sivil nian pendente hamutuk 106. Daudaun nee prosesu krimi sivil no krimi pendente husi Janeiru too mai Junhu hamutuk 369.
Nia esplika, daudaun nee krimi neebe nia numeru aas mak kontra bandu, hanesan hatama sasan ilegal, tuir fali krimi violensia domestika balu ho forma Maus Tratus, no balu ho forma ofensa simples.
Juiz nee dehan, atu redus kazu pendente, uluk iha Juiz ida deit, maibe oras nee daudaun iha ona Juiz nain tolu, tanba nee sira halo ona re distribuisaun ba prosesu pendente neebe iha, no sei re organiza fila fali hodi marka loron julgamentu atu bele redus prosesu pendente.
Luiza reforsa tan, programa ida neebe presiza ba oin sei kontinua realiza mak julgamentu movel, tanba haree ba komunidade sira nia distansia hela fatin ba iha tribunal dook, nomos sei selu gastu osan ba transporte, tanba nee ba oin sei haree koalia ho konselhu, atu oinsa bele implementa fali programa nee.
Iha fatin ketak, Juiza Administradora Tribunal Judisial Primera Instansia Dili, Edite Palmira dehan katak, prosesu pendente Tribunal Dili nian iha, tanba nee ho ferias judisiariu Juiz sira bele elabora tiha sentensa no akordaun sira, tanba dala ruma Juiz sira ba tuir tiha formasaun, haluha halo desizaun, depois fila husi formasaun prosesu kontinua aumenta, bele kauza mos iha foti desizaun nee.
“Prosesu pendente laos ba deit iha desizaun sira neebe Juiz sira la konsege deposita, maibe ba mos prosesu sira neebe distribui ba Juiz sira maibe seidauk termina nia desizaun, dehan Juiza.
Nia hatete, ba prosesu krime iha pendente barak, tanba nee hanesan Juiz Administradora iha papel atu kontrola prosesu sira nee. Buka esforsu atu hare relatoriu husi ofisial sira, atu prosesu sira neebe seidauk lao, halo esforsu hodi bele redus numeru pendente.
Tanba nee, iha ferias judisiariu Juiz sira bele iha konsiensia rasik, karik Juiz balu la foti ferias bele aproveita iha tempu nee hodi hare ba prosesu balu seidauk deside bele aproveita tempu hodi deside iha ferias nee.
Tuir Juiza nee, ho numeru Juiz oras nee dadaun 15 fahe ona atu Juiz balu kaer los prosesu sivil, balu kaer los prosesu krime, hanesan parte ida atu redus numeru pendente neebe iha.
(ter)
