DILI, STLNEWS.co – Ministeriu Publiku (MP) halao alegasaun ba krimi omisidiu simples, konaba kazu vitima Carlito de Deus nia mate.
Iha leitura alegasaun neebe halao iha Kinta (27/07/2022), Prokurador Aderito Tilman deklara, iha sala julgamentu laran arguidu inisial JSM nega faktus neebe akontese iha loron 23 Dezembru 2019. Konaba vitima neebe ema baku mate latan hela iha kampu Futebol Taibesi nian.
MP katak, maski tribunal rona ona sasin lubuk ida, maibe sasin sira la iha konhesimentu hotu kedas konaba akontesimentu nee, no sasin sira mos la haree se mak oho vitima.
Tanba nee, MP konsidera katak, laiha provas mak indika katak, arguidu mak halo hahalok nee, tanba nee konsidera por falta de provas. Iha alegasaun MP husu tribunal koletivu atu absolve arguidu husi instansia.
Rona tiha parte rua, tribunal adia ba loron 22 fulan Novmbru hodi rona desizaun.
Antes nee iha sala julgamentu, arguidu nega ba faktus. No sasin Manuela Soares deklara katak, momentu neeba sasin faan modo iha Merkadu Taibesi, maibe kalan nee sasin la haree ema ruma ba iha vitima nia uma hodi bolu nia sai mai.
Sasin deklara, vitima neebe mate nee hanesan nia subrinu, momentu neeba sasin faan hela modo iha trotoar leten, iha ema balu mak lao tama ba iha vitima nia uma hodi hakuak vitima lori sai husi uma mai, no ema nain rua deit, maibe sasin la konhese sira nia oin, no haree husi kotuk ema modelu ain aas.
Nia reforsa tan, durante faan sasan tinan 5 iha neeba la konhese arguidu, hasoru malu iha tribunal mak lezada foin konhese arguidu.
Iha sala julgamentu laran, MP haree katak lezada nia deklarasaun iha sala julgamentu, la han malu ho lezada nia deklarasaun antes iha MP. Tanba nee juiz prosesu lee fali deklarasaun sasin nian, maibe sasin kontinua mantein la konhese arguidu.
Tuir faktus katak, vitima hanesan negosiante ambulante, no arguidu nudar negosiantes ai maran iha Merkadu Taibesi.
Iha loron 23 fulan Dezembru 2019, ekipa PNTL eskuadra Nain Feto simu informasaun katak, vitima ema baku mate no latan hela iha Kampu Futebol Merkadu Taibesi.
Ekipa PNTL too iha neeba indentifika katak, vitima hetan baku makaas iha parte oin no inus halo raan sai makas.
Parte sira sei halo hela indentifikasaun ba vitima, la kleur arguidu mosu ba ho kondisaun lanu tenta atu foti arguidu nia sinelus besik fatin akontesementu.
Haktuir sasin Manuela momentu neeba arguidu mak hamutuk ho nia kolega sira, hodi lori vitima sai husi sira nia uma ba Kampu Futebol nian.
No tuir sasin sira sai ba kampu Futebol lalais deit, maka rona informasaun katak vitima latan hela.
Tanba nee, MP akuza arguidu komete krimi omisidiu simples neebe previstu iha artigu 138 husi KP.
Audensia julgamentu nee prezidi husi Juiz Koletivu, Albertina Neves, Maria Solana, Afonso Carmona, MP reprezenta husi Prokurador Aderito Tilman, arguidu hetan asistensia legal husi Defensor Publiku Sergio Dias Quintas.
(ter)
