Redus Kazu Pendente Kria Tribunal

DILI, STLNEWS.co – Jurista Timor oan konsidera katak, ohin loron kazu pendente sai preokupasaun ema hotu nian, maibe atu redus kazu pendente presiza kria tribunal iha munisipiu hotu.

Ohin loron ema barak preokupa konaba kazu pendente iha tribunal sira atu redus kazu pendente, hanoin diak liu mak planu kria tribunal iha munisipiu hotu,” dehan Jurista Alexandre Corte Real ba STL iha Tribunal Dili, Kinta (14/12/2023).

Nia hatete, kazu barak mak tama ona iha Ministeriu Publiku, maibe sei pendente, seidauk produs tan akuzasaun haruka ba iha tribunal, nomos kazu barak mak tama ona iha tribunal, maibe dala barak seidauk julga, tanba rekursu umanus menus.

Ohin loron kada tinan universidade sira produs rekursus umanus barak ona, tanba nee sentru formasaun kontinua iha planu loke konkursu ba iha akademiku sira, atu liu husi formasaun bele produs rekursu umanus, hodi bele apoiu servisu iha setor justisa nian.

Iha fatin ketak, Diretora Sentru Formasaun Juridiku no Judisiaria, Marcelina Tilman dehan, ohin loron sentru formasaun fo hela formasaun ba formados lubuk ida, iha juiz, prokurador, defensor inklui notariu nian.

Formasaun lao hela, sentru iha nafatin papel hodi prepara formados sira, maibe tenki tuir regra neebe iha, katak remata husi sentru formasaun tenki ho kualidade,” dehan nia.

Nia hatutan, sentru formasaun mak hanesan fatin ida neebe forma ema atu sai ema neebe tesi lia ba ema seluk, tanba nee iha sentru formasaun atu fo formasaun prepara uluk formador sira, atu liu husi formador sira neebe iha kapasidade diak, formados sira mos sei termina formasaun ho kapasidade neebe diak.

Tuir observasaun STL nian, oras nee daudaun sentru formasaun produs ona juiz, prokuardor, defensor no advogadu lubuk ida mak halao hela knaar iha tribunal 5.

(ter)

LEAVE A REPLY

Please enter your comment!
Please enter your name here