DILI, STLNEWS.co – Lei organizasaun Judisiaria fo fatin atu estabelese Tribunal Supremu Justisa (TSJ), maibe Jurista sira konsidera katak, governu seidauk iha kondisaun atu implementa lei refere.
Tuir Jurista Sergio Dias Quintas katak, lei fo dalan iha konstituisaun nomos lei oragnizasaun judisiaria atu estabelese TSJ, maibe seidauk iha kondisaun.
“Lei fo dalan atu kria TSJ, konstituisaun RDTL iha artigu 124, nunee mos Presidente Republika promulga ona Lei numeru 25/2021 lei da organizasaun judisiaria neebe iha nia artigu 81 fo fatin ba kriasaun Supremu Tribunal Justisa, maibe guvernu seidauk iha kondisaun hodi implementa lei refere tanba sei falta rekursu humanu,” dehan Sergio ba STL iha Tribunal Dili, Segunda (09/10/2023).
Nia hatutan, iha lei hateten, ema sira neebe mak atu tur iha Supremu Tribunal Justisa hanesan Juiz maka tuir Konstituisaun RDTL iha artigu 2 hateten, halo parte Tribunal Supremu Justisa nian, Juiz karreira nian, Majistradu Ministeriu Publiku nian eh jurista sira neebe iha naran boot no iha artigu 82 no 83 husi Lei N.25/2021 dehan katak, komissun de Rekrutamento no selesaun maka sei halo rekrutamentu ba juiz sira neebe maka atu tur iha Supremu Tribunal Justisa.
Iha fatin ketak, Jurista Jose Guterres dehan, tempu ona atu estabelese TSJ, nunee bele tesi lia konaba prosesu sira neebe ita nia lei fo dalan.
“Hanoin bele kria ona TSJ, tanba oras nee daudaun ita iha deit tribunal neebe aas liu mak Tribunal Rekursu, presiza duni kria TSJ,” dehan nia.
Nia esplika, ohin loron tuir lo-loos labele preokupa ona konaba rekursu umanus, maibe oinsa mak planu atu kontinua formasaun ba formados sira, tanba universidade produs ona estudante barak mak remata estudu iha area direitu, ba oin planu deit atu kontinua loke konkursu no formasaun ida nee diak liu atu aumenta numeru autores judisial sira.
(ter)
