DILI, STLNEWS.co – Ministru Justisa hatun ona despaisu atu iha tinan ida nee Sentru Formasaun Juridiku no Judisiariu (SFJJ) loke konkursu ba iha kareira Advogadu Privadu nian.
“Despaisu husi ministru sai tiha ona, ami sei haruka ba iha Jornal da Republika depois publika, sei loke kedan konkursu ba iha Advogadu Privadu,” dehan Diretora Sentru Formasaun Marcelina Tilman ba STL iha Kaikoli, Tersa (08/08/2023).
Tuir Marcelina, iha konkursu nee sei loke ba iha kareira Advogadu Privadu ho numeru 35, maibe sei iha prosesu, tinan nee sei simu deit dokumentus hodi halo teste, no tinan oin mak bele hahu formasaun.
Nia esplika, dekretu lei numeru 10/2020, 25 Marsu, konaba atividade iha sentru formasaun nomos lei advogadu nian nebee hateten, kabe ba iha governu atu apoiu formasaun ba Advogadu Privadu sira, bazeia ba ida nee mak sentru formasaun mos loke konkursu ba iha Advogadu Privadu nian.
“Sentru Formasaun nafatin halo selesaun ho rigorozu, la eziste familiarizmu, se mak prienxe rekezitu bele pasa hodi tuir formasaun, se mak la prienxe rekejitus labele pasa. Tanba sentru formasaun produs ema atu tesi lia konaba justisa nian, tanba nee presiza duni ema neebe iha kapasidade no konhesimentu diak,” tenik Marcelina.
Nia akresenta, atu haree ba kualidade, Sentru Formasaun la haree ba kuota, sei haree deit se mak hatene bele liu, tanba remata formasaun iha sentru formasaun tenki ho kapasidade diak, hodi halao knsar hanesan advogadu. Tanba knaar nee fo asistensia ba kliente sira neebe hasoru krimi, maibe tenki fo asistensia ida neebe diak ba kliente sira, mak hahu ho formasaun.
“Oras nee daudaun iha ona advogadu lubuk ida mak halao hela knaar nee, maibe ba oin ita sei estabelese tan tribunal iha munisipiu no tribunal superior, tanba nee prepara mos numeru advogadu nian,” nia hatete.
Iha fatin ketak, Prezidente Asosiasaun Majislatura Judisial TL, Antonino Gonsalves dehan, sentru formasaun halao nia knaar tuir regra neebe iha, liu-liu halo selesaun ba kandidatu sira ho rigorozu.
“Selesaun laos ba advogadu deit, maibe ba mos kandidatu sira seluk tenki ho rigorozu, atu remata formasaun husi fatin neeba bele halao knaar ho diak, atu labele hamosu duvidas iha sosiedade nia leet,” dehan nia.
Reforsa tan, servisu neebe sentru formasaun halo labele interven husi ema se deit, tanba servisu nee atu forma ema ida hodi hetan kareira ka knaar ida la fasil, tenki liu husi dalan oin-oin.
Esplika tan, iha rekursu umanus barak mak oras nee daudaun halao knaar ho diak, maibe iha balu mak halao knaar seidauk masimu, hirak nee esforsu no formasaun husi sentru formasaun mak ikus mai hetan knaar ida nee.
Husu atu ba oin presiza mos haree konaba lei advogadu nian, tanba lei mak kesi metin sira halao knaar.
(ter)
