Sidadaun Indonezia Tenta Tuir Eleisaun, Hetan Medida Prizaun Preventiva

DILI, STLNEWS.co – Tribunal Judisial Primera Instansia Dili (TJPID) liu husi despaisu ikus, aplika medida prizaun preventiva ba arguidu ho inisial VAG hanesan sidadaun Indonezia, neebe tenta atu vota iha eleisaun parlamentar neebe halao iha loron 21 foin lalais nee.

Kazu nee akontese iha Suku Darulete, Postu Administrativu Likisa Vila, Munisipiu Likisa.

Prosesu nee taka ba iha publiku, maibe husi parte Ministeriu Publiku (PM) nian promove arguidu ba iha krimi Fraude Votasaun neebe previstu iha artigu 237, no krimi Falsifikasaun Agravadu neebe previstu iha artigu 304 no krime Burla Agravadu.

Liu husi despaisu ba prosesu nee, Juiz Alvaro Maria Freitas desidi aplika medida prizaun preventiva ba iha arguidu.

‚ÄúDespaisu ikus tribunal aplika medida prizaun preventiva ba iha arguidu, tanba haree arguidu hanesan sidadaun Indonezia iha perigu ba fuga, no asegura arguidu atu investigasaun prokurador no parte seguransa lao diak, tanba nee mak aplika medida nee,” dehan Advogadu Privadu, Marino da Cruz ba jornalista sira iha TJPID, Kuarta nee (24/05/2023).

Nia sublina, bainhira simu despaisu husi tribunal, sira nia parte sei haree, karik iha posibilidade bele haruka rekursu, mak defeza sei halo rekursu kontra despaisu tribunal nian.

Hatan konaba krimi burla neebe promove ba arguidu, defeza dehan iha investigasaun MP mak bele hatene lo-loos, ida nee loos duni ka lae.

Tuir informasaun husi defeza arguidu nian katak, arguidu mai Timor la iha ema ruma mak fasilita, maibe ho arguidu nia inisiativa rasik, tanba nee hahu kedan iha tinan 2005 arguidu ba mai ona iha Suku Durulete, hodi vizita familia sira.

Defeza dehan tan, arguidu hetan eleitoral, tanba momentu neeba nia husu iha xefi suku, mak xefi suku dehan atu halo eleitoral tenki iha deklarasaun husi Kefa, tanba nee mak arguidu mos ba halo deklarasaun lori mai hodi prosesu hetan eleitoral.

No arguidu hakarak fila mai Timor, tanba reforma husi polisia iha loron 1 fulan Maiu nee, tanba nee iha loron 17 Maiu nia mai iha Timor hodi tarata asuntu sira nee.

Arguidu mos informa ba nia defeza katak, momentu neeba arguidu ba Indonezia iha tinan 1999, momentu neeba nia ferik oan isin rua hela, halai ba foho la diak sira desidi halai ba Kefa.

Arguidu informa mos ba defeza katak, iha eleisaun prezidensia tinan kotuk mos arguidu ezerese nia votu.

Iha alegasaun ba prosesu nee, MP husu atu aplika medida prizaun preventiva, defeza husu medida aprezentasaun periodika.

Prosesu nee Prezide husi juiz turnu Alvaro Maria Freitas, MP reprezenta husi Prokurador Joao Marques, arguidu hetan asistensia legal husi Advogadu Privadu Marino da Cruz.

()

LEAVE A REPLY

Please enter your comment!
Please enter your name here