DILI, STLNEWS.co – Loron 7 fulan Setembru 2023, akontese kazu omisidiu iha Munisipiu Ermera, Suspeitu inisial E taa Vitima Berdandino mate fatin, no nain rua kanek, hein prosesu ba Ministeriu Publiku (MP).
Tuir portavoz Komando Polisia Nasional Timor-Leste (PNTL), Superintendente Polisia Antonio da Luz, relasiona ho akontesimentu neebe akontese kazu omisidiu iha Munisipiu Ermera, neebe rezulta ema ida mate no nain rua kanek.
“Suspeitu inisial E nee ita kaptura iha Aldeia Buibaro Leimea, agora daudaun sei detein iha Komando PNTL Munisipiu Ermera, ita hein trasporta mai hodi tuir kontinuasaun prosesu ba Ministeriu Publiku,” hatete nia ba jornalista sira iha salaun Komandu Jeral PNTL, Segunda (11/09/2023).
Nia tenik, liu husi esforsu membru Komando PNTL Munisipiu Ermera nian, sira kaptura ona suspeitu iha Aldeia Buibaro, Leimea, oras tuku 5:30, no daudaun nee suspeitu detein ona iha sela eskuarda Letefoho, Komando PNTL Munisipiu Ermera nian, no hein atu trasporta mai Komandu Jeral Munsipiu Dili, hodi prosesu kontinuasaun ba Ministeriu Publiku (MP).
“Ita tenki lori ba prosesu justisa neebe mak iha, atu nunee nia bele responsabiliza kazu neebe nia komete,” nia esplika.
Nia informa, iha momentu neeba suspeitu halai, tanba nee membru PNTL sira halo patrolha no buka tuir too sira hetan, no agora tama ona sela polisia.
Nia esplika, suspeitu E moras mental ou lae, nee parte investigasaun no mediku mak bele hatene, suspeitu moras mental ou lae, tanba PNTL nian mak haree ba kazu neebe nia komete.
Konaba moras mental ou lae, nee labele haree ba ida nee. Ida nee parte mediku mak bele determina. Depois motivu problema nee prosesu investigasaun mak hatene, tanba vitima nain rua hetan ona tratamentu.
Nia hatutan, tanba nee parte investigasaun rekolha ona dadus kompletu motivu husi problema nee, hein submete ba Ministeriu Publiku (MP) haree prosesu kontinuasaun.
Iha fatin ketak, fontes konfirmadu esplika, sira halao serimonia kultura ida iha Aldeia Buibaro, Leimea, tanba nee vitima nain rua ho Matebian Bernandino tuir hamutuk hodi konta istoria, maibe derepenti suspeitu insial E nee mai ho katana taa mate Matebian Bernandino no nain rua atu hasoru hodi hadau katak mos nia taa hotu.
“Ita haree akontesimentu suspeitu mai taa nee derepenti deit, ami hotu-hotu la hatene, ami husu deit ba PNTL atu prosesa suspeitu nee tuir lei neebe vigor iha ita nia rai doben ida nee,” nia deklara.
(jen)
