DILI, STLNEWS.co – Jurista Timor oan konsidera katak, too ona tempu atu estabelese tribunal iha munisipiu sira, nunee bele lori justisa hakbesik ba komunidade sira.
Tempu too ona atu lori justisa hakbesik ba iha komunidade sira, tanba nee tenki estabelese tribunal iha munisipiu sira, atu sosiedade sira mos senti katak justisa besik ba iha sira,” dehan Jurista Alexandre Corte Real ba STL iha Dili, Domingu (03/09/2023).
Nia hatutan, durante nee tribunal estabelese deit iha munisipiu balu, tanba nee iha komunidade balu sente katak justisa sei dook husi sira, tanba atu tuir julgamentu deit sei lao ho distansia neebe dook.
Tanba nee, apresia ho lei judisiariu foun, tanba fo dalan kria tribunal iha munisipiu sira, atu lori justisa hakbesik ba iha komunidade sira.
Iha fatin ketak, Defensor Publiku Jeral Cansio Freitas dehan, apresia ho lei judisiariu foun atu kria tribunal iha munisipiu sira, maibe husu atu sentru formasaun kontinua prepara formados sira.
“Ida nee diak estabelese tribunal iha munisipiu hotu, fasil ba komunidade sira asesu justisa, sei la lao ho distansia neebe dook, maibe presiza mos prepara rekursu umanus atu ba halao knaar iha fatin sira nee,” dehan nia.
Tuir Cansio, ohin loron numeru ba autores judisial sira sei menus, tanba nee husu sentru formasaun kontinua fo formasaun ba formados sira, atu tempu ruma konstrusaun ba tribunal sira remata, bele koloka ba iha fatin sira nee hodi halao knaar.
(ter)
