DILI, STLNEWS.co – Ministeriu Publiku tenki halo investigasaun klean ba joven ida neebe mak mate iha sela, labele arkiva.
Kestaun nee hatoo husi Visi I Diretora Asosiasaun Hak, Filomena Barros dos Reis katak, presiza halo investigasaun ba kazu joven ida neebe mak mate iha sela polisia Kaikoli, Ministeriu Publiku mak tanki hatene aselera oinsa kazu joven mate iha sela, husu mos polisia nia responsabilidade.
“Ita husu tenki tau justisa nee justu, tanba nee mak labele hanoin kazu nee atu arkiva deit, maibe tenki halo investiga klean, nunee justisa nee justu ba ema hotu, no inan faluk husi joven nee mos hein nafatin justisa, tanba nee mak husu Ministeriu Publiku ho PSIK haree ba kazu nee, no HAK halo akompanha nafatin, ita hakilar nafatin tanba injustisa mosu,” dehan Visi I Diretora Asosiasaun Hak Filomena Barros dos Reis ba STL iha nia knaar fatin Farol, Kinta nee (30/03/2023).
Visi HAK hatutan, se kazu hanesan nee mak akontese ba ema boot ruma ohin rame rame buka tuir justisa, maibe tanba deit kazu nee akontese ba povu kiik sira, entau justisa hein kleur no tuir mai arkiva.
Filomena dehan, se halo sala dehan, lialos bele mosu, labele subar beibeik lialos, no lei nee vale ba ema hotu, nunee povu mos bele senti justisa nee ho diak.
Nunee mos Diretor Ezekutivu Asia Justice And Rights AJAR, Jose Luis de Oliveira hatete, presiza halo investigasaun klean ba kazu joven ida neebe mak mate iha sela, tanba kazu nee deskonfia omisidiu.
“Mai hau deskofia kazu nee omisidiu, omisidiu iha polisia nia liman se mak la deskonfia, tanba polisia nia papel mak atu fo protesaun, agora o ida fo protesaun mak o husik hela mate iha sela, berarti o komete,” katak nia.
Diretor nee dehan, kazu ida nee sai hanesan sasukat ba kapasidade investigasaun iha PSIK no prokurador, se kazu ida nee mak orgaun judisiariu lori suspeitu ba, signifika orgaun polisia, PSIK, Prokurador laiha kapasidade atu servi ba justisa.
Tuir Prokurador Jeral Republika, Alfonso Lopez katak, relasiona ho kazu sidadaun ida mate iha sela, prokurador deklara katak, investigasaun ba prosesu nee sei konklui iha fulan nee, hodi haree lo-loos prosesu nee arkiva ka akuza.
Nia sublinha, prosesu investigasaun prokurador titular mak sei halo ida nee, no bainhira investigasaun remata ona, sempre iha despaisu husi prokurador titular konaba prosesu nee, sei haree akuza ka arkiva.
(eme)
