DILI, STLNEWS.co – Ministeriu Publiku liu husi nia alegasaun ba krimi ofensa simples no arma branka, husu tribunal atu aplika pena ba iha arguidu BMSB, neebe lori katana tenta atu ta lezadu inisial PDL.
Alegasaun neebe halao iha loron Kuarta nee (26/07/2023), Prokurador Simiao Brito husu ba tribunal koletivu atu kondena arguidu ho pena prizaun tinan 3 suspende ba tinan 3, tanba konsidera faktus neebe konsta iha akuzasaun provadu hotu, katak arguidu komete duni krimi rua nee.
Enkuantu husi parte Defeza Jose Guterres katak, husu tribunal atu tetu deklarasaun hotu no aplika pena neebe justu no adekuadu ba iha arguidu.
Rona tiha parte rua, tribunal adia ba loron seluk, hodi rona desizaun.
Tuir akuzasaun neebe iha katak, iha loron 18 fulan Junhu 2021, lezadu husi uma ba iha servisu fatin Kompanhia Xanhai, kuandu too iha servisu fatin, lezadu ho nia kolega servisu sira ho kareta atu ba iha terenu hodi halo servisu kompanhia nian.
Bainhira arguidu sira ho sira nia kolega too iha Ermera, arguidu kaer katana ida hein hela lezadu.
kuandu haree lezadu ho kareta, arguidu haksoit tun ba hasoru lezadu neebe tur hela iha kareta kotuk lori katana taa kedas lezadu, maibe la kona tanba lezadu haksoit tun husi kareta, no ain tur fai ba iha alkatraun halo kanek kedas.
Arguidu kontinua atu lori tan katana taa dala ida, maibe lezadu hader hodi halai. Arguidu sei kontinua duni atu taa maibe la konsege tanba lezadu haksoit tiha ba moru sorin, depois ba aprezenta kedan keixa iha polisia, no halo tratamentu iha Sentru Saude Ermera.
Konsekuensia husi arguidu nia hahalok nee halo lezadu senti kanek iha ain tur. Tanba nee, MP akuza arguidu komete krimi Ofensa Integridade Fizika Simples neebe Previstu iha artigu 145, no krimi Arma Branka lei numeru 5/2017.
Audensia julgamentu nee prezidi husi Juiz Koletivu Afonso Carmona, Albertina Neves, Maria Solana, MP reprezenta husi Prokurador Simiao Brito, arguidu hetan asistensia legal husi Defensor Publiku.
(ter)
