DILI, STLNEWS.co – Relasiona toleránsia pontu ba loron rua, tribunal kontinua funsiona hodi atende kazu urjente.
“Toleránsia pontu no loron boot saida deit, tribunal kontinua funsiona hodi atende kazu urjente sira,” dehan Juiz Administrador Tribunal Judisial Primeira Instansia Dili, Afonso Carmona ba STL, Kuarta nee (19/04/2023).
Carmona sublina, prosesu urjensia neebe tribunal atende liu husi juiz turnu neebe antes nee marka ona, tanba nee sira halao knaar hodi atende nafatin prosesu urjensia.
Tuir regra, kuandu prosesu urjensia laos juiz mesak deit mak bele halao prosesu nee, maibe presiza kompleta husi prokurador no defensor, tanba nee loron boot iha mos prokurador no defensor turnu.
Carmona reforsa, prosesu urjensia mak hanesan prosesu sumariu, primeiru interogatoriu, kondenadu prezu, nomos prosesu sivil sira neebe tama iha kategoria urjensia.
Tuir observasaun STL nian katak, prosesu balu neebe antes nee marka ba iha loron Kinta no Sesta, tribunal halo ona notifikasaun ba parte sira atu adia ba loron seluk.
Tanba iha loron boot tribunal halao julgamentu ba iha prosesu neebe ho natureza urjensia deit.
(ter)
