Tribunal Absolve Diretor Prevensaun KAK

DILI, STLNEWS.co – Tribunal Judisial Primera Instansia Dili, iha loron Kinta, 14/12/2023 liu husi desizaun ikus, absolve arguidu inisial RSA, neebe hanesan Diretor Jeral Prevensaun no Sensibilizasaun Komisaun Anti Korupsaun (KAK).

Iha desizaun nee, Juiz prosesu Albertina Neves deklara, absolve arguidu husi krime refere, tanba konsidera faktus neebe konsta iha akuzasaun la provadu.

Tuir defeza arguidu nian, Marsal Mascarinhas katak, razaun arguidu uza laptop nee, nia funsun atu fahe informasaun.

“Razaun dehan file nee iha laptop laran, diretor nia funsaun mak fahe informasaun ka divulga lei ba komunidade sira, liu-liu ba joven sira hodi prevene labele komete krime sira, ligasaun ho krime korupsaun, pekulatu, no seluk seluk tan,” dehan Marsal ba STL iha tribunal.

Nia hatete, ho ida nee tribunal konsidera katak, faktus neebe iha la provadu, hodi absolve arguidu husi krime neebe MP akuza ba.

Antes nee, iha alegasaun Ministeriu Publiku husu tribunal atu aplika pena multa ba iha arguidu RSA neebe hanesan Direktor Jeral Prevensaun no Sensibilizasaun Komisaun Anti Korupsaun (KAK).

Aleinde nee, Defeza Marsal Mascarinhas iha alegasaun, aseita ho pedidu Ministeriu Publiku nian, no husu Tribunal atu aplika pena multa ba iha arguidu.
Tuir akuzasaun husi Ministeriu Publiku iha inidisiu sufisiente katak, arguidu RSA hanesan funsionariu publiku iha Komisaun Anti-Korupsaun hanesan Director Jeral ba prevensaun, nia mos hanesan militante partidu balun.

Iha loron 14 Janeiru 2023, arguido utiliza Portatil (Leptop) ho marka HP kor sinjentu partisipa iha eventu partidu politiku. Portatil ho marka HP kor sinjentu, rejistradu nudar patrimoniu Komisaun Anti-Korupsaun atribui ba iha arguidu, tanba asumi kargu hanesan Diretor Jeral ba prevensaun. Finalidade ba atende servisu KAK nian.

Maibe arguido uza fali patrimonio estadu hanesan sasan privadu hodi ba iha eventu partidu politiku nian no laiha autorizasaun hosi superior hirarkia, arguidu halo ida nee hodi benefisia nia aan no grupu balun.

Arguidu hatene katak, utiliza patrimonio estadu ba benefisia nia aan no grupu balun sem autorizasaun husi instituisaun ka uza ba finalidade KAK maibe ba fali partidu nee kontra regras neebe iha, maibe arguido kontinua halo ida nee.
Ho nunee, enkontru katak, iha indisiu forti kontra arguidu ba pratika krimi Pekulatu de Uzu tuir artigu 83 lei 7/2020 konaba mediade prevensaun no kombate korupsaun.

Audensia julgamentu nee, prezide husi juiz singular Albertina Neves, MP reprezenta husi Prokurador Rogerio Viegas, arguidu hetan asistensia legal husi Defensor Publiku Marsal Mascarinhas.

(ter)

LEAVE A REPLY

Please enter your comment!
Please enter your name here