DILI, STLNEWS.co – Tribunal Judisial Primera Instansia Dili liu husi despaisu ikus aplika medida Termu Indentidade Rezidensia (TIR) ba arguidu inisial LBT, neebe deskonfia hanesan sidadaun estranjeiru halo falsifikasaun ba dokumentus hodi sai hanesan sidadaun Timor oan.
Iha despaisu nee, Juiz turnu Ana Paula Fonseca desidi aplika medida TIR ba iha arguidu.
Prosesu nee taka ba iha publiku, maibe Ministeriu Publiku promove krimi tolu ba iha arguidu, Falsifikasaun Dokumentus Agravadu, Brankamentus Kapitais no Devasa.
Tuir defeza arguidu nian Octavio Cardoso katak, tribunal aplika medida refere tanba konsidera laiha indisus forti.
“Los tanba iha faze primeiru interogatoriu nota momos, tribunal apresia tuir provas neebe podus iha faze primeiru interogatoriu, la iha indisus forti, tanba nee mak MP husu aprezentasaun periodika, hau husu aplika TIR deit, ikus mai tribunal aplika medida nee,” dehan nia ba jornalista sira iha tribunal, Kinta (10/08/2023).
Nia hatutan, iha alegasaun husu TIR, tanba konsidera faktus no evidensia la forti, no elementus krimi neebe MP promove la prienxe rekejitus tuir tribunal nia entendimentu.
Defeza deklara, tuir dokumentus neebe iha hatudu katak, arguidu moris iha Timor.
Prosesu nee prezide husi Juiz Turnu Ana Paula Fonseca, MP reprezenta husi Prokurador Rogerio Viegas, arguidu hetan asistensia legal husi Advogadu Privadu Octavio Cardoso.
(ter)
