DILI, STLNEWS.co – Tribunal Judisial Primera Instansia Dili kontinua rona sasin ba kazu neebe komete husi arguidu nain 3 ho inisial FADSC, AB no VS.
Julgamentu kontinuasaun nee halao iha loron Kinta nee (13/07/2023), neebe prezide husi juiz koletivu, Alvaro Maria, Jose Gonsalves, Arjentino Nunes, Prokurador Aderito Tilman, no parte sira hetan asistensia legal husi Defensor Publiku no Advogadu Privadu.
Antes nee tribunal rona ona deklarasaun husi arguidu sira, inklui sasin balu, tanba nee iha julgamentu kontinuasaun nee, tribunal rona sasin Agusto neebe katak, sasin laiha konhesimentu konaba envolvimentu arguidu FADSC ba rai ida nee, tanba nee atu desidi hetan osan momentu neeba sasin sira desidi arguidu atu hetan osan quatro a sete (4a7) nian.
Maibe ikus fali mai sasin sira rona fali husi arguidu katak, nia hetan osan oitu a quatorze (8a14) nian, tanba nee sasin sira la aseita hodi levanta prosesu nee ba oin.
Sasin deklara tan, deklarasaun balu neebe dehan FALINTIL balu lori kilat mai iha arguidu hodi las, nia parte laiha konhesimentu konaba ida nee.
Hatan konaba arguidu VS, sasin katak, konaba arguidu nee sira laiha buat ruma, tanba ba prosesu ida nee sasin sira halo kontestasaun hasoru arguidu FADSC, tanba hetan osan 8a14 nian.
Iha fatin hanesan, sasin Caitano Conjaga Dos Santos katak, konhese arguidu FADCS momentu neeba nia loke benkel ida, no envolve iha klandestina iha ai laran, too fila mai Dili bapa sira kaer hodi halo indentifikasaun.
Nia hatutan, nia mos rona informasaun katak, momentu neeba arguidu mos tulun hodi las kilat. Maibe konaba bapa ida neebe hela iha arguidu nia uma, sasin laiha konhesimentu konaba ida nee.
Rona tiha parte sira nee, tribunal adia ba loron seluk hodi rona fali sasin balu.
(ter)
