DILI, STLNEWS.co – United Nations Development Programme (UNDP) fo apoiu ba iha prizaun Gleno liu husi Ministeriu Justisa, hodi halo reabilitasaun ba bloku kondenadu feto sira nian, tuir estandar internasional.
Lia hiran nee hatoo husi Diretor Nasional Servisu Prizional Reoseresaun Sosial, Delfio Alves ba STL iha Dili, Sesta nee (07/07/2023).
Diretor Nasional Servisu Prizional Reoseresaun Sosial, Delfio Alves dehan, hetan fundu husi UNDP hodi reabilitasaun ba bloku rekuzu feto sira nian iha prizaun Gleno, atu rekuzu sira bele senti seguru.
“Reabilitasaun neebe lao hela agora atinji ona 90%, no tuir estandar internasional neebe UNDP sira temi Nelson Mandela Room,” tenik nia.
Nia karesenta, iha tempu badak reabilitasaun nee sei remata, atu rekurzu feto sira bele utiliza.
“Oras nee daudaun prizaun Gleno tau dadur feto, kuandu sira moras mai halo tratamentu iha hospital boot bele tau iha prizaun Bekora, maibe rekupera husi ida nee sira kontinua ba iha prizaun Gleno,” dehan nia.
Tuir Akademiku UNTL, Miguel Martins katak, presiza kria kondisaun diak ba rekuzu feto sira, maski sira halo sala ona.
“Hau nia hanoin presiza kria kondisaun diak ba sira, maski sira hetan ona kastigu, nafatin tarata sira ho dignu,” dehan nia.
Akademiku nee husu atu ba oin presiza koloka mos dadur feto sira tuir prizaun neebe sira nia familia hela besik ba, atu fasil hetan vizita.
(ter)
