CC Sente La Kontente Bainhira Tama Izolamentu

DILI, STLNEWS.co – Pasiente Covid-19 ho inisial CC la kontente bainhira tama iha izolamentu Eternite Fatuhada, tanba fatin nee la kontrola husi ministeriu relevante.

Kestaun nee hatoo husi pasiente Covid-19 ho inisial CC neebe konfimadu, ba STL liu husi telefone, Domingu nee (29/08/2021). Nia hatete, durante sira tama iha izolamentu defikuldade neebe mak sira hasoru mak fatin nee la kontrola husi ministeriu relevante, halo sira lakon esperansa.

“Hau esperansa wainhira simu rezultadu swab test katak hau pozitifu covid, hau prontu kumpre regra no tama izolamentu hodi rekupera no garantia saude diak i bele livre husi covid wainhira atu ba fali hau nia uma. Maibe depois de tama fatin izolamentu hau haree situasaun no kondisaun, hau laran triste fali,” dehan nia.

Nia afirma, nia parte triste tanba la garantia livre husi covid hafoin kumpre 14 dias iha izolamentu, tanba fatin pasiente foun ho tuan neebe atu rekupera ona diferente laiha (hamutuk deit iha salaun ida no uza fasilidade hamutuk).

Nunee mos fatin izolamentu ba pasiente, normalmente tenke hakmatek no la akumula ema barak hanesan ema kriminozu sira iha kadeia. La fo aimoruk, maibe dala ruma pesoal saude mai koko tensaun no temperatura (laos obrigatoriu).

“Pasiente neebe akumula kuaze 50 pesoas kada aula no sira haklalak (karaoke, fuma, feto mane vizita malu, book malu ate meianoite). Iha fatin nee seguransa laiha, neebe pasiente ida labele manda pasiente seluk. Nee mak pasiente barak preokupa oras deskansa nian,” katak nia.

Nia hatutan, hahan dader matabisu paun fuan 2, ho jus 1, meudia han etu, modo ho naan mak troka malu, loraik tuku 4 merenda dosin 2 ho jus 1 no kalan han etu hanesan meudia. Nia tama Izolamentu hahu iha loron 26 Agostu, oras 16.30 OTL.

Nunee mos pasiente ho inisial JMBS dehan, loloos tama izolamentu atu deskansa, maibe realidade lae. Ba hasoru fali kanta, toka, joga karta no bingo mak iha izolamentu laran.

“Ami labele deskansa tanba barullu los, balun kanta karoke, joga bingo, karta no lao tun sae halo ami labele deskansa,” katak nia.

Konaba hahan nee, sira dader matabisu ho dose, meudia han etu, lokraik merenda ho dose, no kalan han etu. Konaba tratamentu iha izolamentu mediku sira ba, maibe ba koko tensaun deit sira neebe mak moras mak husu aimoruk ba mediku sira.

Hatan ba kestaun nee Koordenador Pilar 7 husi Sentru Integradu Jestaun Krize (SIJK), Doutor Nilton Do Carmo Da Silva katak, izolamentu Eternite Fatuhada labele kontrola tanba pasiente barak mak izola an iha neeba.

“Hotel Eternite nee akumula ema barak duni, tanba nee mak susar kontrola tanba ema barak los maibe ami nia papel mak nee, ami sempre fo hanoin ba maluk sira mai nee mai ho moras, tanba nee mak presiza duni konsiensia katak ema seluk presiza deskansa, tanba nee labele halo movimentu ba mai no labele hakilar tun sae nee ami sempre fo hanoin, tanba dala barak ema barak entau susar kontrola,” katak nia.

Nia hatutan, fatin nee laos deskontrola, tanba mediku sira sempre ba iha neeba, maibe tanba akumula ema barak.*

Reportajen & Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

KM Aprova Dekretu Lei Apoiu Nesesidade Baziku Ba Funsionariu Publiku

DILI , STLNEWS.co – Konsellu Ministru (KM) halao sorumutu iha Palasiu Governu aprova ona projetu dekretu-lei, atu kria subsidiu mensal ai-han nian ba funsionariu...

MAE Fo Pose Ba Prezidente Autoridade Munisipiu Dili

DILI, STLNEWS.co – Governu liu husi Ministeriu Administrasaun Estatal (MAE), fo pose ba Prezidente Autoridade Munisipiu Dili foun. Ministru Administrasaun Estatal (MAE) Miguel Pereira de...

Update Covid-19 TL 20 Setembru: Kazu Positivu 25, Rekuperadu 127 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu positivu iha ema nain 25, rekuperadu 127 no obitu nain 1. "Kazu detetadu foun neebe...
%d bloggers like this: